‘ഇതുവരെ കണ്ടതല്ല, വരാനിരിക്കുന്നത്’; പ്രതീക്ഷകള്‍ വാനോളം ഉയര്‍ത്തി ഫഹദിന്റെ ട്രാന്‍സ് ട്രെയിലറിന് ഗംഭീര പ്രതികരണം.

വർഷങ്ങൾക്കു ശേഷം അൻവർ റഷീദ് സംവിധാനം ചെയ്ത ചിത്രമാണ് ഫഹദ് ഫാസിൽ നായകനായ ട്രാൻസ്. ഈ വരുന്ന ഫെബ്രുവരി 20 നു കേരളത്തിൽ റിലീസ് ചെയ്യാൻ പോകുന്ന ട്രാൻസ് പ്രേക്ഷകർ ഏറെ ആകാംഷയോടെയും ആവേശത്തോടെയും കാത്തിരിക്കുന്ന ചിത്രങ്ങളിലൊന്നാണ്. ഇന്ന് ഈ ചിത്രത്തിന്റെ ട്രൈലെർ റിലീസ് ചെയ്യുകയും ഗംഭീര പ്രതികരണം നേടിയെടുക്കുകയുമാണ്. ത്രസിപ്പിക്കുന്ന ഒരു സിനിമാനുഭവമായിരിക്കും ഈ ചിത്രം തരികയെന്ന ഫീൽ ആണ് ഈ ട്രൈലെർ നൽകുന്നത്. എന്നാൽ സിനിമയുടെ കഥയെ കുറിച്ചുള്ള ഒരു സൂചന പോലും ട്രെയ്ലറിൽ നിന്ന് ലഭിക്കുന്നില്ല എന്നതും ശ്രദ്ധേയമാണ്. കൂടുതലും ഈ ചിത്രത്തിലെ കഥാപാത്രങ്ങളേയും അവരുടെ സ്വഭാവത്തെയുമൊക്കെയാണ് ഈ ട്രൈലെർ നമ്മുടെ മുന്നിലെത്തിക്കാൻ ശ്രമിച്ചിരിക്കുന്നത്. ഒരു കംപ്ലീറ്റ് ഫഹദ് ഫാസിൽ ഷോ ആയി ട്രാൻസ് മാറുമെന്ന ഫീലാണ് ട്രൈലെർ നൽകുന്നതെന്ന് പറയാം. ആക്ഷനും ആവേശവും സസ്‌പെൻസും കോമെഡിയുമെല്ലാം നിറഞ്ഞ ഒരു കംപ്ലീറ്റ് എന്റെർറ്റൈനെറാവും ഈ ചിത്രമെന്നും ട്രൈലെർ പറയുന്നു.

നവാഗതനായ വിൻസെന്റ് വടക്കൻ തിരക്കഥ രചിച്ച ഈ ചിത്രം നിർമ്മിച്ചിരിക്കുന്നതും സംവിധായകൻ അൻവർ റഷീദ് ആണ്. അമൽ നീരദ് കാമറ ചലിപ്പിച്ച ഈ ചിത്രത്തിന് ഗാനങ്ങൾ ഒരുക്കിയത് ജാക്‌സൺ വിജയൻ ആണ്. പശ്ചാത്തല സംഗീതമൊരുക്കിയത് ജാക്‌സൺ വിജയനൊപ്പം സുഷിൻ ശ്യാമും ചേർന്നാണെങ്കിൽ എഡിറ്റിങ് നിർവഹിച്ചിരിക്കുന്നത് പ്രവീൺ പ്രഭാകർ ആണ്. റസൂൽ പൂക്കുട്ടി സൗണ്ട് ഡിസൈൻ നിർവഹിച്ച ഈ ചിത്രത്തിൽ ഫഹദ് ഫാസിൽ കൂടാതെ നസ്രിയ നാസിം, ദിലീഷ് പോത്തൻ, സൗബിൻ ഷാഹിർ, വിനായകൻ, ചെമ്പൻ വിനോദ്, ഗൗതം വാസുദേവ് മേനോൻ, ശ്രീനാഥ് ഭാസി എന്നിവരും അഭിനയിക്കുന്നുണ്ട്.