പരസ്പരം മത്സരിച്ച് നൃത്തം വെച്ച് ചിരഞ്ജീവിയും സൽമാൻ ഖാനും; കൊഴുപ്പ് കൂട്ടാൻ പ്രഭുദേവയും; ഗോഡ്ഫാദർ സോങ് വീഡിയോ ഇതാ

ഇന്ത്യൻ സിനിമയിലെ മെഗാതാരങ്ങളായ ചിരഞ്ജീവിയും സൽമാൻ ഖാനും ആദ്യമായി ഒന്നിക്കുന്ന ഗോഡ്ഫാദർ എന്ന ചിത്രത്തിലെ ലിറിക് വീഡിയോ ഗാനമാണിപ്പോൾ സോഷ്യൽ മീഡിയയുടെ ശ്രദ്ധ നേടുന്നത്. മോഹൻ രാജ സംവിധാനം ചെയ്ത ഈ ചിത്രം ബ്ലോക്ക്ബസ്റ്റർ മലയാളം ചിത്രമായ ലൂസിഫറിന്റെ റീമേക്കാണ്. താർ മാർ തക്കർ മാർ എന്ന വരികളോടെ തുടങ്ങുന്ന ഈ ഡാൻസ് നമ്പർ ആലപിച്ചിരിക്കുന്നത് ശ്രേയ ഘോഷാലും ഇതിനു വരികൾ രചിച്ചത് അനന്ത ശ്രീരാമുമാണ്. നേരത്തെ അതിന്റെയൊരു പ്രോമോ ടീസർ പുറത്ത് വരികയും ശ്രദ്ധ നേടുകയും ചെയ്തിരുന്നു. ഇപ്പോഴിതാ ഈ ഗാനത്തിന്റെ ലിറിക് വീഡിയോ പുറത്തു വന്നിരിക്കുകയാണ്. തമൻ എസ് ആണ് ഈ ചിത്രത്തിന് വേണ്ടി സംഗീതമൊരുക്കിയത്. കംപ്ലീറ്റ് ആക്ടർ മോഹൻലാലിനെ നായകനാക്കി യുവ സൂപ്പർ താരം പൃഥ്വിരാജ് സുകുമാരൻ സംവിധാനം ചെയ്ത ലൂസിഫറിന്റെ ഈ തെലുങ്ക് റീമേക്കിൽ, മോഹൻലാൽ, പൃഥ്വിരാജ് എന്നിവർ മലയാളത്തിൽ ചെയ്ത കഥാപാത്രങ്ങളായാണ് ചിരഞ്ജീവി, സൽമാൻ ഖാൻ എന്നിവർ തെലുങ്കിലെത്തിയിരിക്കുന്നത്.

പ്രഭുദേവയാണ് ഇതിനു വേണ്ടി നൃത്ത സംവിധാനം ചെയ്തിരിക്കുന്നത്. അതിനൊപ്പം അദ്ദേഹം ഈ ഗാനത്തിൽ പ്രത്യക്ഷപ്പെട്ടു കൊണ്ട്, ചിരഞ്ജീവിക്കും സൽമാൻ ഖാനുമൊപ്പം ചുവടു വെക്കുന്നുമുണ്ട്. ലേഡി സൂപ്പർ സ്റ്റാർ നയൻ താര, പുരി ജഗന്നാഥ്, സത്യ ദേവ്, ഹാരിഷ് ഉത്തമൻ, ജയപ്രകാശ്, സച്ചിൻ കടേക്കർ, വംശി കൃഷ്ണ, നാസർ എന്നിവരും വേഷമിട്ട ഈ ചിത്രം കോണിഡാല പ്രൊഡക്ഷൻ കമ്പനിയും സൂപ്പർ ഗുഡ് ഫിലിംസും ചേർന്നാണ് നിർമ്മിച്ചിരിക്കുന്നത്. നേരത്തെ ഈ ചിത്രത്തിന്റെ ടീസർ പുറത്തു വന്നപ്പോൾ വലിയ വിമർശനമാണ് സോഷ്യൽ മീഡിയയിൽ നിന്നും ഉണ്ടായത്. ഏതായാലും വരുന്ന ഒക്ടോബർ അഞ്ചിന് ഈ ചിത്രം റിലീസ് ചെയ്യുന്നത് കാത്തിരിക്കുകയാണ് ആരാധകർ.