മോഹൻലാൽ ഒരുക്കുന്ന ബറോസ് ഫൈറ്റ് ടീമിന്റെ വൈറലാവുന്ന സ്റ്റണ്ട് റിഹേഴ്സൽ; വീഡിയോ കാണാം..!

കംപ്ലീറ്റ് ആക്ടർ മോഹൻലാൽ ആദ്യമായി സംവിധാനം ചെയ്യുന്ന ചിത്രമാണ് ബറോസ്, നിധി കാക്കും ഭൂതം. മോഹൻലാൽ തന്നെ നായകനായി അഭിനയിക്കുന്ന ഈ ചിത്രത്തിന്റെ ഷൂട്ടിംഗ് ഇപ്പോൾ പുരോഗമിക്കുകയാണ്. ഇപ്പോഴിതാ, ഈ ചിത്രത്തിലെ സംഘട്ടനം ഒരുക്കുന്ന ടീം ജെ ക്രിയേറ്റിവ് ആക്ഷൻ സംഘത്തിന്റെ സ്റ്റണ്ട് റിഹേഴ്സൽ വീഡിയോ ആണ് സോഷ്യൽ മീഡിയയിൽ വൈറലായി മാറുന്നത്. ആശീർവാദ് സിനിമാസിന്റെ യൂട്യൂബ് ചാനലിലൂടെയാണ് ഈ വീഡിയോ പുറത്തു വന്നിരിക്കുന്നത്. മാർഷ്യൽ ആർട്സ് മോഡലിൽ ആണ് ഈ ചിത്രത്തിലെ സംഘട്ടന രംഗങ്ങൾ ഒരുക്കുന്നത് എന്ന സൂചനയാണ് ഈ റിഹേഴ്സൽ വീഡിയോ നൽകുന്നത്. ഒരു ത്രീഡി ഫാന്റസി ഡ്രാമയായി വമ്പൻ ബഡ്ജറ്റിൽ ഒരുങ്ങുന്ന ഈ ചിത്രം രചിച്ചിരിക്കുന്നത് ജിജോ പുന്നൂസും നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരുമാണ്.

തല മൊട്ടയടിച്ച, പിരിച്ചു വെച്ച മീശയും നീളമുള്ള താടിയുമായി കിടിലൻ മേക്കോവറിലാണ് മോഹൻലാൽ ഈ ചിത്രത്തിൽ എത്തുന്നത്. ഇതിന്റെ ഫസ്റ്റ് ലുക്ക് പോസ്റ്റർ വലിയ രീതിയിൽ ആണ് സോഷ്യൽ മീഡിയയിൽ വൈറലായി മാറിയത്. സന്തോഷ് ശിവൻ കാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് ലിഡിയൻ നാദസ്വരവും എഡിറ്റ് ചെയ്യുന്നത് ശ്രീകർ പ്രസാദുമാണ്. വിദേശ താരങ്ങൾ ഉൾപ്പെടെ ഉള്ളവർ വേഷമിടുന്ന ഈ ചിത്രത്തിൽ നാനൂറു വർഷം പ്രായമുള്ള ബറോസ് എന്ന് പേരുള്ള ഒരു ഭൂതമായാണ് മോഹൻലാൽ അഭിനയിക്കുന്നത്. മോഹൻലാലിനൊപ്പം മിന്നൽ മുരളിയിലെ സൂപ്പർ വില്ലൻ ഗുരു സോമസുന്ദരവും ഈ ചിത്രത്തിൽ അഭിനയിക്കുന്നുണ്ട്. വരുന്ന മാർച്ച് / ഏപ്രിൽ മാസത്തോടെ ഇതിന്റെ ഷൂട്ടിംഗ് പൂർത്തിയാവും എന്നാണ് പ്രതീക്ഷിക്കപ്പെടുന്നത്.