ദളപതി വിജയ്‌യുടെ സൂപ്പർ ഹിറ്റ് ഗാനത്തിന് നൃത്തം വെച്ചു ബോളിവുഡ് താരം ശിൽപ ഷെട്ടി..!

പ്രശസ്ത ബോളിവുഡ് നടിയായ ശിൽപ ഷെട്ടി തന്റെ ടിക് ടോകിൽ പങ്ക് വെച്ച പുതിയ വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്. ദളപതി വിജയ്ക്ക് സമർപ്പിച്ചു കൊണ്ടുള്ള ഒരു ഡാൻസ് വീഡിയോ ആണ് ശിൽപ ഷെട്ടി പങ്ക് വെച്ചിരിക്കുന്നത്. വിജയ് ചിത്രമായ മാസ്റ്ററിലെ സൂപ്പർ ഹിറ്റ് ഗാനമായ വാത്തി കമിങ് എന്ന ഗാനത്തിനാണ് ശിൽപ ഷെട്ടി ചുവട് വെച്ചിരിക്കുന്നത്. മാസ്റ്റർ റിലീസ് ആയിട്ടില്ലെങ്കിലും അതിലെ രണ്ടു ഗാനങ്ങളുടെ ലിറിക്ക് വീഡിയോകൾ റീലീസ് ചെയ്യുകയും സൂപ്പർ ഹിറ്റായി മാറുകയും ചെയ്തു. കുട്ടി സോങ് എന്നൊരു ഗാനമാണ് ഈ ചിത്രത്തിലെ സൂപ്പർ ഹിറ്റായി മാറിയ മറ്റൊരു ഗാനം. അത് ആലപിച്ചിരിക്കുന്നതും വിജയ് ആണ്.

അനിരുദ്ധ് രവിചന്ദർ സംഗീതം പകർന്നിരിക്കുന്ന ഈ ചിത്രം സംവിധാനം ചെയ്തിരിക്കുന്നത് ലോകേഷ് കനകരാജ് ആണ്. ഏപ്രിൽ ഒൻപതിന് റിലീസ് ചെയ്യാനിരുന്ന ഈ ചിത്രം കോവിഡ് 19 ഭീഷണി മൂലം റിലീസ് നീട്ടി വെക്കപ്പെട്ട തെന്നിന്ത്യൻ ചിത്രങ്ങളിലൊന്നാണ്. എക്‌സ് ബി ക്രിയേഷൻസിന്റെ ബാനറിൽ സേവ്യർ ബ്രിട്ടോ നിർമ്മിച്ച ഈ ചിത്രം രചിച്ചിരിക്കുന്നത് സംവിധായകൻ ലോകേഷും രത്ന കുമാറും ചേർന്നാണ്. വിജയ്ക്കൊപ്പം മക്കൾ സെൽവൻ വിജയ് സേതുപതിയും അഭിനയിക്കുന്ന ഈ ചിത്രത്തിൽ വമ്പൻ താര നിരയാണ് അണിനിരക്കുന്നത്. ശന്തനു ഭാഗ്യരാജ്, മാളവിക മോഹനൻ, ഗൗരി കിഷൻ, അർജുൻ ദാസ്, ആൻഡ്രിയ, ശ്രീമാൻ, പ്രേം, സഞ്ജീവ്, ശ്രീനാഥ്, രമ്യ സുബ്രമണ്യൻ, രമേശ് തിലക് എന്നിവരും ഈ ചിത്രത്തിൽ അഭിനയിക്കുന്നു. ഈ ചിത്രത്തിന്റെ കാമറ ചലിപ്പിച്ചത് സത്യൻ സൂര്യനും എഡിറ്റ് ചെയ്തിരിക്കുന്നത് ഫിലോമിൻ രാജുമാണ്.