ശരിയേത് തെറ്റേത് ഈ വഴിയിൽ; കനിഹ- ടിനി ടോം ജോഡിയുടെ പെർഫ്യൂംമിലെ പുത്തൻ വീഡിയോ ഗാനം കാണാം

കനിഹ പ്രധാന വേഷം ചെയ്ത പെർഫ്യൂം എന്ന ചിത്രത്തിലെ പുതിയ ഗാനമാണ് ഇപ്പോൾ സോഷ്യൽ മീഡിയയുടെ ശ്രദ്ധ നേടുന്നത്. ശരിയേത് തെറ്റേത് ഈ വഴിയിൽ എന്ന വരികളോടെ തുടങ്ങുന്ന ഗാനത്തിൽ കനിഹ, ടിനി ടോം എന്നിവരാണ് പ്രധാന വേഷങ്ങൾ ചെയ്തിരിക്കുന്നത്. വളരെ ഇഴുകി ചേർന്നാണ് ഇരുവരും ഈ ഗാനത്തിലഭിനയിച്ചിരിക്കുന്നത്. അത് തന്നെയാണ് ഈ ഗാനത്തിന് വലിയ പ്രേക്ഷക ശ്രദ്ധ ലഭിക്കാനുള്ള കാരണവും എന്ന് പറയാം. മലയാളത്തിലെ ഇതിഹാസങ്ങളിൽ ഒരാളായ ശ്രീകുമാരൻ തമ്പി വരികൾ രചിച്ച ഈ ഗാനം ആലപിച്ചത് മധുശ്രീ നാരായണനും ഈ ഗാനത്തിന് ഈണം നൽകിയിരിക്കുന്നത് രാജേഷ് ബാബു കെ ശൂരനാടുമാണ്. ഒരു ഫാമിലി ത്രില്ലർ ആയി ഒരുക്കിയിരിക്കുന്ന ഈ ചിത്രത്തിന്റെ ടീസർ നേരത്തെ തന്നെ പുറത്ത് വരികയും പ്രേക്ഷക ശ്രദ്ധ നേടുകയും ചെയ്തിരുന്നു. ടിനി ടോം, കനിഹ എന്നിവരെ കൂടാതെ അന്തരിച്ചു പോയ പ്രതാപ് പോത്തൻ, ദേവി അജിത് എന്നിവരും മുഖ്യ വേഷങ്ങളിൽ എത്തുന്ന ഈ ചിത്രം സംവിധാനം ചെയ്തിരിക്കുന്നത് ഹരിദാസ് ആണ്.

മോത്തി ജേക്കബ് എന്ന നിർമ്മാതാവ് മോത്തി ജേക്കബ് പ്രൊഡക്ഷൻസിന്റെ ബാനറിൽ നിർമ്മിച്ച ഈ ചിത്രം രചിച്ചിരിക്കുന്നത് കെ പി സുനിൽ ആണ്. സജിത് മേനോൻ ക്യാമറ ചലിപ്പിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് അമൃത ലൂക്കയാണ്. നേരത്തെ വന്ന നീലവാനം എന്ന് തുടങ്ങുന്ന ഇതിലെ ഒരു ഗാനവും മികച്ച പ്രേക്ഷക ശ്രദ്ധ നേടിയെടുത്തിരുന്നു. അഡ്വക്കേറ്റ് ശ്രീരഞ്ജിനി രചിച്ച ആ ഗാനം ആലപിച്ചിരിക്കുന്നത് കെ എസ് ചിത്രയും സുനിൽ കുമാർ പി കെയും ആണ്. കനിഹയും ടിനി ടോമും ഭാര്യ- ഭർത്താക്കന്മാർ ആയി അഭിനയിച്ചിരിക്കുന്ന ഈ ചിത്രം പ്രതാപ് പോത്തൻ അവസാനമായി അഭിനയിച്ച ചിത്രങ്ങളിൽ ഒന്നാണ്.