പാർ‌ട്ടീന്റെ കൊടി പിടിച്ചിട്ട് ഒരു സേവ് ദ ഡേറ്റ് ഷൂട്ട് ചെയ്താലോ; ആക്ഷേപ ഹാസ്യവുമായി പടച്ചോനെ ഇങ്ങള് കാത്തോളീ വരുന്നു; പുതിയ ടീസർ ഇതാ

പടച്ചോനെ ഇങ്ങള് കാത്തോളീ എന്ന ഏറ്റവും പുതിയ മലയാള ചിത്രത്തിന്റെ പ്രീ റിലീസ് ടീസറുകളാണ് ഇപ്പോൾ സോഷ്യൽ മീഡിയയിൽ നിറഞ്ഞു നിൽക്കുന്നത്. യുവതാരം ശ്രീനാഥ് ഭാസിയെ നായകനാക്കി ബിജിത് ബാല സംവിധാനം ചെയ്ത ഈ ചിത്രം നാളെയാണ് പ്രേക്ഷകരുടെ മുന്നിലെത്തുക. ആക്ഷേപ ഹാസ്യത്തിന് പ്രാധാന്യം നൽകി ഒരുക്കുന്ന ഈ ചിത്രത്തിന്റെ പുതിയ ടീസറുകളും അതിലെ ഹരീഷ് കണാരൻ കഥാപാത്രത്തിന്റെ രസകരമായ ഡയലോഗുകളും സൂപ്പർ ഹിറ്റായി മാറുകയാണ്. ചെറുപ്പക്കാരെ പാര്‍ട്ടിയില്‍ പിടിച്ചു നിര്‍ത്താൻ കമ്മ്യൂണിസ്റ്റ് മാട്രിമോണിയുണ്ടാക്കണം എന്ന വഴി പാർട്ടിക്ക് പറഞ്ഞു കൊടുക്കുന്ന ഈ കഥാപാത്രത്തിന്റെ പുതിയ ഐഡിയയാണ് പുതിയ ടീസറിൽ കാണിക്കുന്നത്. പാർ‌ട്ടീന്റെ കൊടി പിടിച്ചിട്ട് ഒരു സേവ് ദ ഡേറ്റ് ഷൂട്ട് ചെയ്താലോ എന്നാണ് വിവാഹിതനാകാൻ പോകുന്ന പാർട്ടി സഖാവിനോടുള്ള ഈ കഥാപാത്രത്തിന്റെ ചോദ്യം. ഈ ചിത്രത്തിന്റെ ട്രൈലെർ, ഇതിലെ ഗാനങ്ങൾ എന്നിവയും സൂപ്പർ ഹിറ്റാണ്.

സഖാവ് ദിനേശൻ എന്ന കഥാപാത്രമായി ശ്രീനാഥ് ഭാസി അഭിനയിച്ചിരിക്കുന്ന ഈ ചിത്രം ടൈനി ഹാൻഡ്സ് പ്രൊഡക്ഷൻസിന്റെ ബാനറിൽ ജോസ്കുട്ടി മഠത്തിൽ, രഞ്ജിത്ത് മണംബ്രക്കാട്ട്‌ എന്നിവർ ചേർന്നാണ് നിർമ്മിച്ചിരിക്കുന്നത്. ആക്ഷേപ ഹാസ്യത്തിനൊപ്പം പ്രണയത്തിനും വൈകാരിക മുഹൂർത്തങ്ങൾക്കും ഈ ഫാമിലി എന്റെർറ്റൈനെർ ചിത്രത്തിൽ സ്ഥാനമുണ്ട്. ആൻ ശീതൾ നായികാ വേഷം ചെയ്യുന്ന ഈ ചിത്രത്തിൽ ഗ്രേസ്‌ ആൻ്റണി, രസ്ന പവിത്രൻ, അലെൻസിയർ, ജോണി ആന്റണി, മാമുക്കോയ, ഹരീഷ് കണാരൻ, ദിനേശ് പ്രഭാകർ, ശ്രുതി ലക്ഷ്മി, നിർമൽ പാലാഴി, വിജിലേഷ്, നിർമ്മാതാക്കളിൽ ഒരാളായ രഞ്ജിത്ത് മണമ്പ്രക്കാട്ട്, നാഥാനിയേൽ മഠത്തിൽ, ഉണ്ണി ചെറുവത്തൂർ, രഞ്ജിത്ത് കൺകോൽ എന്നിവരും അഭിനയിച്ചിരിക്കുന്നു.