സാറേ ഒന്നും തോന്നരുത്, ഒരാനയെ ഒപ്പിക്കാൻ പറ്റുമോ; മനസ്സിൽ തൊടാൻ സൗദി വെള്ളക്ക; ട്രൈലെർ എത്തി

2021 ഇൽ റിലീസ് ചെയ്ത് വലിയ പ്രേക്ഷക – നിരൂപക പ്രശംസ നേടിയ മലയാള ചിത്രമാണ് നവാഗതനായ തരുൺ മൂർത്തി സംവിധാനം ചെയ്ത ഓപ്പറേഷൻ ജാവ. ഇപ്പോൾ തന്റെ രണ്ടാമത്തെ ചിത്രവുമായി എത്തുകയാണ് തരുൺ മൂർത്തി. സൗദി വെള്ളക്ക എന്ന് പേരിട്ടിരിക്കുന്ന ഈ ചിത്രം വരുന്നഡിസംബർ രണ്ടിനാണ് റിലീസ് ചെയ്യാൻ പോകുന്നത്. ഇതിന്റെ പോസ്റ്ററുകൾ, ടീസർ എന്നിവയെല്ലാം വലിയ പ്രേക്ഷക ശ്രദ്ധയാണ് നേടിയെടുത്തത്. അത് കൂടാതെ ഇതിലെ ഒരു ഗാനവും ശ്രദ്ധ നേടിയിരുന്നു. പകലോ കാണാതെ എന്ന വരികളോടെ തുടങ്ങുന്ന ഗാനത്തിന്റെ ലിറിക് വീഡിയോയാണ് പുറത്ത് വന്നത്. ഈ കഴിഞ്ഞ ഇന്റർനാഷണൽ ഫിലിം ഫെസ്റ്റിവൽ ഓഫ് ഇന്ത്യയിലാണ് സൗദി വെള്ളക്കയുടെ പ്രീമിയർ നടന്നത്. മികച്ച പ്രതികരണമാണ് അവിടെ നിന്ന് ഈ ചിത്രം നേടിയത്. ഇപ്പോൾ ഈ ചിത്രത്തിന്റെ ട്രൈലെർ കൂടി പുറത്ത് വന്നിരിക്കുകയാണ്.

കോടതി വ്യവഹാരങ്ങളുടെ പശ്‌ചാത്തലത്തിൽ കഥ പറയുന്ന, ഹാസ്യത്തിനും ആകാംഷാഭരിതമായ നിമിഷങ്ങൾക്കും പ്രാധാന്യമുള്ള ഒരു ചിത്രമാണ് ഇതിനുള്ള സൂചനയാണ് ഈ ട്രൈലെർ നൽകുന്നത്. അതോടൊപ്പം മനസ്സിൽ തൊടുന്ന വൈകാരിക മുഹൂർത്തങ്ങളും ഇതിന്റെ ഭാഗമാണെന്ന് ട്രൈലെർ കാണിച്ചു തരുന്നുണ്ട്. തൊണ്ടിമുതലും ദൃക്‌സാക്ഷിയും, സത്യം പറഞ്ഞാല്‍ വിശ്വസിക്കുമോ എന്നീ ചിത്രങ്ങള്‍ക്കുശേഷം ഉർവശി തീയേറ്റേഴ്സിന്റെ ബാനറിൽ സന്ദീപ് സേനൻ നിർമ്മിച്ച ഈ ചിത്രത്തിൽ ലുക്ക് മാന്‍ അവറാന്‍, ദേവീ വര്‍മ്മ, സിദ്ധാര്‍ഥ് ശിവ, ബിനു പപ്പു, സുജിത്ത് ശങ്കര്‍, ഗോകുലന്‍, റിയ സെയ്‌റ, ധന്യ, അനന്യ എന്നിവരാണ് പ്രധാന വേഷങ്ങൾ അവതരിപ്പിച്ചിരിക്കുന്നത്. ഈ ചിത്രത്തിന് ക്യാമറ ചലിപ്പിച്ചിരിക്കുന്നത് ശരൺ വേലായുധനും എഡിറ്റ് ചെയ്തിരിക്കുന്നത് നിഷാദ് യൂസഫുമാണ്. പാലി ഫ്രാൻസിസ് ആണ് ഇതിന്റെ സംഗീത സംവിധായകൻ.