ദളപതിക്കുള്ള ബർത്ത്ഡേ സ്പെഷ്യൽ നൃത്തവുമായി സാനിയ ഇയ്യപ്പനും അച്ഛനും; വീഡിയോ വൈറലാകുന്നു..!

ക്വീൻ, ലൂസിഫർ, പതിനെട്ടാം പടി, പ്രേതം 2 എന്നീ ചിത്രങ്ങളിലൂടെ മലയാള സിനിമാ പ്രേക്ഷകർക്കിടയിൽ ശ്രദ്ധേയയായ നടിയാണ് സാനിയ ഇയ്യപ്പൻ. അഭിനയ മികവ് കൊണ്ടും നൃത്തം ചെയ്യാനുള്ള കഴിവ് കൊണ്ടും സൗന്ദര്യം കൊണ്ടും പ്രേക്ഷക പ്രീതി നേടിയ ഈ നടിയുടെ പുതിയ ഡാൻസ് വീഡിയോ ഇപ്പോൾ സോഷ്യൽ മീഡിയയിൽ വൈറലാവുകയാണ്. ദളപതി വിജയ് നായകനായ മാസ്റ്റർ എന്ന ചിത്രത്തിലെ വാത്തി കമിങ് എന്ന ഗാനത്തിന്റെ കവർ വേർഷനായാണ് സാനിയയുടെ നൃത്തം ഒരുക്കിയിരിക്കുന്നത്. എന്നാൽ ഈ വീഡിയോയുടെ ഏറ്റവും വലിയ സവിശേഷത, ഇതിൽ സാനിയയുടെ ഒപ്പം ചുവടു വെച്ചിരിക്കുന്നത് സാനിയയുടെ അച്ഛനായ ഇയ്യപ്പനാണ് എന്നതാണ്. അച്ഛനും മകളും തകർത്തു നൃത്തം വെക്കുന്ന ഈ വീഡിയോ ഫാദേഴ്‌സ് ഡേ ആയിരുന്ന ഇന്നലെയാണ് പുറത്തു വന്നത്. തന്റെ സ്വന്തം യൂട്യൂബ് ചാനലിലൂടെ സാനിയ പുറത്തു വിട്ടിരിക്കുന്ന ഈ വീഡിയോ ഇന്ന് ജന്മദിനം ആഘോഷിക്കുന്ന ദളപതി വിജയ്‌ക്കുള്ള ഒരു ജന്മദിന സമ്മാനമാണ് എന്ന് കൂടി പറയാം.

ഇനി റിലീസ് ചെയ്യാൻ പോകുന്ന മാസ്റ്റർ എന്ന ചിത്രത്തിന് വേണ്ടി അനിരുദ്ധ് രവിചന്ദർ ആണ് ഈ ഗാനത്തിന് ഈണമിട്ടത്. സൂപ്പർ ഹിറ്റായി മാറിയ ഈ ഗാനത്തിനൊപ്പം വിജയ് ആലപിച്ച കുട്ടി സ്റ്റോറി എന്ന ഗാനവും ഇപ്പോഴേ വമ്പൻ ഹിറ്റായി കഴിഞ്ഞു. ലോകേഷ് കനകരാജ് രചിച്ചു സംവിധാനം ചെയ്ത ഈ ചിത്രം എക്സ് ബി ക്രീയേഷന്സിന്റെ ബാനറിൽ സേവ്യർ ബ്രിട്ടോയാണ് നിർമ്മിച്ചിരിക്കുന്നത്. വിജയ്ക്ക് ഒപ്പം മക്കൾ സെൽവൻ വിജയ് സേതുപതിയും അഭിനയിച്ചിരിക്കുന്ന ഈ ചിത്രത്തിൽ ആൻഡ്രിയ ജെർമിയ, ശന്തനു ഭാഗ്യരാജ്, അർജുൻ ദാസ്, മാളവിക മോഹനൻ തുടങ്ങി ഒരു വമ്പൻ താരനിര തന്നെ അണിനിരക്കുന്നുണ്ട്. ഏതായാലും ഇന്ന് ജന്മദിനമാഘോഷിക്കുന്ന ദളപതിക്കു ആശംസകളുമായി സോഷ്യൽ മീഡിയയിൽ നിറഞ്ഞു നിൽക്കുകയാണ് ഇന്ത്യൻ സിനിമാ ലോകവും ദളപതി ആരാധകരും.