നടി മൃദുലയുടെ വിവാഹത്തിൽ കിടിലൻ ഡാൻസുമായി രമ്യ നമ്പീശനും സംഘവും; വീഡിയോ കാണാം..!

പ്രശസ്ത മലയാള നടിയും അവതാരകയുമായ മൃദുല മുരളി കഴിഞ്ഞ ദിവസം വിവാഹിതയായി. നിതിൻ വിജയൻ എന്നാണ് മൃദുലയുടെ വരന്റെ പേര്. കോവിഡ് മാനദണ്ഡങ്ങൾ എല്ലാം തന്നെ പാലിച്ചു കൊണ്ട് ഇന്നലെ കൊച്ചിയിൽ വെച്ചാണ് വിവാഹ ചടങ്ങുകൾ നടന്നത്. അടുത്ത ബന്ധുക്കളും സുഹൃത്തുക്കളും മാത്രം പങ്കെടുത്ത ചടങ്ങിൽ മൃദുലയുടെ അടുത്ത സുഹൃത്തുക്കളായ നടി രമ്യ നമ്പീശൻ, പിന്നണി ഗായിക സയനോര എന്നിവരും എത്തിയിരുന്നു. വധുവിനും വരനും ആശംസകളേകിയ രമ്യ നമ്പീശനും കൂട്ടുകാരികളും മൃദുലക്കും നിതിനുമൊപ്പം നൃത്തവുമാടി. ഏതായാലും കൂട്ടുകാരിയുടെ കല്യാണത്തിന് അവരുമൊത്തു നൃത്തം ചെയ്യുന്ന രമ്യ നമ്പീശന്റെ വീഡിയോ ഇപ്പോൾ സോഷ്യൽ മീഡിയയിൽ വൈറലാവുകയാണ്. വിവാഹവേദിയിൽ നിന്നുള്ള മറ്റ്‌ വീഡിയോകളും ചിത്രങ്ങളും ആരാധകർക്കിടയിൽ പ്രചരിക്കുന്നുണ്ട്. അവതാരകയായി അരങ്ങേറ്റം കുറിച്ച മൃദുല ഒരു മികച്ച ക്ലാസിക്കൽ ഡാൻസറും മോഡലും ആണ്.

മോഹൻലാലിനെ നായകനാക്കി ഷാജി കൈലാസ് ഒരുക്കിയ റെഡ് ചില്ലീസ് എന്ന ചിത്രത്തിലൂടെയാണ് മൃദുല മുരളി അഭിനേതാവായി അരങ്ങേറ്റം കുറിച്ചത്. അതിനു ശേഷം ലാൽ ജോസ് ഒരുക്കിയ കുഞ്ചാക്കോ ബോബൻ ചിത്രം എൽസമ്മ എന്ന ആണ്കുട്ടി, 10.30 എ എം ലോക്കൽ കാൾ, ബോളിവുഡ് ചിത്രമായ രാഗ് ദേശ് എന്നിവയിലും അഭിനയിച്ച മൃദുല അവസാനമായി അഭിനയിച്ചത് ഫഹദ് ഫാസിൽ നായക വേഷത്തിലെത്തിയ വിനീത് കുമാർ ചിത്രം അയാൾ ഞാനല്ലയിൽ ആണ്. നടനായ മിഥുൻ മുരളി, മൃദുലയുടെ സഹോദരനാണ്. മൃദുലയുടെ ഭർത്താവ് നിതിൻ പരസ്യ കമ്പനിയിലാണ് ജോലി ചെയ്യുന്നത്. 2019 ഡിസംബർ മാസത്തിലാണ് ഇരുവരുടെയും വിവാഹ നിശ്ചയം കഴിഞ്ഞത്.