അറബിക് കുത്തിന് ശേഷം വീണ്ടും ജാനി മാസ്റ്റർ; അഞ്ജലിയുടെ ഗ്ലാമർ നൃത്തവുമായി രാ രാ റെഡ്‌ഡി

പ്രശസ്ത തെന്നിന്ത്യൻ നായികാ താരമായ അഞ്ജലിയുടെ അതീവ ഗ്ലാമറസ്സായുള്ള നൃത്ത ചുവടുകളുമായി എത്തിയ പുത്തൻ തെലുങ്ക് ഗാനം ഇപ്പോൾ സോഷ്യൽ മീഡിയയിൽ വൈറലാവുകയാണ്. രാ രാ റെഡ്‌ഡി, ഐ ആം റെഡി എന്ന വരികളോടെ തുടങ്ങുന്ന ഗാനത്തിന്റെ ലിറിക്കൽ വീഡിയോ ആണ് ഇപ്പോൾ റിലീസ് ചെയ്തിരിക്കുന്നത്. ചിത്രത്തിലെ നായകനായ നിതിനും അഞ്ജലിക്കൊപ്പം ഈ ഗാനത്തിൽ ചുവട് വെക്കുന്നുണ്ട്. ജൂലൈ ഒൻപതിന് ആദിത്യ മ്യൂസിക്കിന്റെ യൂട്യൂബ് ചാനലിൽ റിലീസ് ചെയ്ത ഈ ഗാനത്തിന് വമ്പൻ പ്രേക്ഷക പ്രതികരണമാണ് ലഭിക്കുന്നത്. 24 മണിക്കൂർ കൊണ്ട് 65 ലക്ഷത്തിലധികം കാഴ്ചക്കാരെയാണ് ഈ ഗാനത്തിന് ലഭിച്ചിരിക്കുന്നത്. മചെർള നിയോജകവർഗം എന്ന ചിത്രത്തിന് വേണ്ടിയാണു ഈ ഗാനമൊരുക്കിയിരിക്കുന്നത്. മഹതി സ്വര സാഗർ സംഗീതമൊരുക്കിയ ഈ ഗാനത്തിന് വരികൾ രചിച്ചത് കാസർല ശ്യാമാണ്.

ലിപ്സിക, ഉമനീഷ, അമൃത വർഷിണി, ശ്രുതി രഞ്ജിനി, ആദിത്യ എന്നിവർ ചേർന്നാണ് ഈ ഗാനമാലപിച്ചിരിക്കുന്നതു. നിതിൻ, കൃതി ഷെട്ടി, കാതറീൻ എന്നിവർ പ്രധാന വേഷങ്ങൾ ചെയ്യുന്ന ഈ ചിത്രം രചിച്ചു സംവിധാനം ചെയ്തിരിക്കുന്നത് എം എസ് രാജശേഖര റെഡ്ഢിയാണ്. ശ്രേഷ്ട മൂവീസ്, ആദിത്യ മൂവീസ് ആൻഡ് എന്റർടൈൻമെന്റ് എന്നിവയുടെ ബാനറിൽ രാജ്‌കുമാർ അകേല, സുധാകർ റെഡ്‌ഡി, നികിത റെഡ്‌ഡി എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിന് ക്യാമറ ചലിപ്പിച്ചത് പ്രസാദ് മുറെല്ലയും എഡിറ്റ് ചെയ്തിരിക്കുന്നത് കോട്ടഗിരി വെങ്കിടേശ്വര റാവുവുമാണ്. മാമിഡാല തിരുപതിയാണ് ഈ ചിത്രത്തിന് വേണ്ടി സംഭാഷണങ്ങൾ രചിച്ചത്. നിതിൻ ആരാധകർ ഏറെ ആവേശത്തോടെ കാത്തിരിക്കുന്ന ഈ ചിത്രം ഓഗസ്റ്റ് പന്ത്രണ്ടിനാണ് റിലീസ് ചെയ്യാൻ പോകുന്നത്.