കെ കെയുടെ അവസാന ഗാനവുമായി ദി ലെജൻഡ് ടീം; വീഡിയോ കാണാം

പരസ്യങ്ങളിലൂടെ ശ്രദ്ധേയനായ ബിസിനസ്സ്മാൻ ലെജൻഡ് ശരവണൻ ആദ്യമായി നായകനായെത്തുന്ന ദി ലെജൻഡ് എന്ന ചിത്രം റിലീസിന് ഒരുങ്ങുകയാണ്. വരുന്ന ജൂലൈ 28 നാണു ഈ ചിത്രം തീയേറ്ററുകളിൽ എത്തുക. ജെ ഡി ആൻഡ് ജെറി എന്നീ സംവിധായകർ ചേർന്നൊരുക്കിയ ഈ ചിത്രം നിർമ്മിച്ചിരിക്കുന്നതും നായകനായ ലെജൻഡ് ശരവണൻ തന്നെയാണ്. ഇപ്പോഴിതാ ഈ ചിത്രത്തിലെ പുതിയ വീഡിയോ സോങ് പുറത്തു വന്നിരിക്കുകയാണ്. പോപോപ്പോ എന്ന വരികളോടെ തുടങ്ങുന്ന ഈ ഗാനത്തിന്റെ ഹൈലൈറ്റ് നായകനായ ലെജൻഡ് ശരവണനും നായികയായ ഉർവശി റൗട്ടേലയും കാഴ്ച വെച്ചിരിക്കുന്ന മികച്ച നൃത്തമാണ്. ഒരടിപൊളി ഗാനമായി പ്രേക്ഷകരെ രസിപ്പിക്കുന്ന രീതിയിലാണ് ഇതൊരുക്കിയിരിക്കുന്നത്, നായികയായ ഉർവശി റൗട്ടേല ഗ്ലാമറസായാണ് ഈ ഗാനത്തിൽ പ്രത്യക്ഷപ്പെട്ടിരിക്കുന്നത്. ഇതിന്റെ ടീസർ, ട്രൈലെർ, ഇതിലെ മറ്റു ഗാനങ്ങൾ എന്നിവ നേരത്തെ തന്നെ പുറത്തു വരികയും വലിയ പ്രേക്ഷക ശ്രദ്ധ നേടുകയും ചെയ്തിരുന്നു.

മദൻ കർക്കി വരികൾ രചിച്ച ഇപ്പോൾ പുറത്തു വന്നിരിക്കുന്ന ഈ ഗാനം ആലപിച്ചിരിക്കുന്നത് അന്തരിച്ചു പോയ ഗായകൻ കെ കെ, പ്രസാദ് എസ് എൻ, ജോണിത ഗാന്ധി എന്നിവരാണ്. ഹാരിസ് ജയരാജ് ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചത്. പ്രഭു, വിവേക്, നാസർ, വിജയകുമാർ, കോവൈ സരള, ഗീതിക, യോഗി ബാബു എന്നിവരും വേഷമിട്ടിരിക്കുന്ന ഈ ചിത്രം, സയൻസ് ഫിക്ഷന് പ്രാധാന്യമുള്ള രീതിയിലാണ് ഒരുക്കിയിരിക്കുന്നത്. ആക്ഷനും കോമേഡിയും പ്രണയവും നൃത്തവുമെല്ലാം ഉൾപ്പെടുത്തിയ ഒരു മാസ്സ് എന്റെർറ്റൈനെർ തന്നെയാണ് ദി ലെജൻഡ് എന്നാണു ഇതിന്റെ ട്രൈലെർ കാണിച്ചു തരുന്നത്.