പത്മനാഭന്റെ മണ്ണിൽ രാജകീയ വരവേൽപ്പ്; പൊന്നിയിൻ സെൽവൻ ടീം കേരളത്തിലെത്തി; വീഡിയോ കാണാം

തമിഴിൽ നിന്നൊരുങ്ങിയ ബ്രഹ്മാണ്ഡ ചിത്രമായ പൊന്നിയിൻ സെൽവൻ റിലീസാവാൻ പോവുകയാണ്. മണി രത്‌നം സംവിധാനം ചെയ്ത ഈ ബ്രഹ്മാണ്ഡ ചിത്രം രണ്ടു ഭാഗങ്ങളായാണ് ഒരുക്കിയിരിക്കുന്നത്. അതിന്റെ ആദ്യ ഭാഗമാണ് ഈ വരുന്ന സെപ്റ്റംബർ മുപ്പതാം തീയതി റിലീസ് ചെയ്യാൻ പോകുന്നത്. ഇതിന്റെ ട്രൈലെർ സൂപ്പർ ഹിറ്റായതിന് പിന്നാലെ പുറത്തു വന്ന ഇതിലെ ഗാനങ്ങളും ഇപ്പോൾ സോഷ്യൽ മീഡിയയിൽ തരംഗമാണ്. ഇപ്പോഴിതാ ഈ ചിത്രത്തിന്റെ പ്രമോഷന്റെ ഭാഗമായി കേരളത്തിൽ എത്തിയിരിക്കുകയാണ് ഇതിലെ വലിയ താരനിര. തിരുവനന്തപുരത്തു വെച്ചാണ് പൊന്നിയിൻ സെൽവൻ പ്രമോഷൻ പരിപാടി നടക്കുന്നത്. അതിൽ പങ്കെടുക്കാൻ ചിയാൻ വിക്രം, കാർത്തി, ജയം രവി, തൃഷ എന്നിവരും മലയാളി നായികാ താരമായ ഐശ്വര്യ ലക്ഷ്മിയും തിരുവനന്തപുരത്തെത്തി. അവർക്ക് ലഭിച്ച വരവേൽപ്പിന്റെ വീഡിയോ ഇപ്പോൾ ശ്രദ്ധ നേടുകയാണ്.

ഇവരെ കൂടാതെ സംവിധായകൻ മണി രത്‌നവും ഈ പരിപാടിയിൽ പങ്കെടുക്കും. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ഈ ചിത്രം കേരളത്തിൽ വിതരണം ചെയ്യുന്നത്. ഐശ്വര്യ റായ്, ജയറാം, ലാൽ, ബാബു ആന്റണി, റിയാസ് ഖാന്‍, റഹ്മാന്‍, ശരത് കുമാർ, പാർത്ഥിപൻ, പ്രഭു, കിഷോർ, വിക്രം പ്രഭു, ശോഭിത, നിഴൽകൾ രവി, അർജുൻ ചിദംബരം, റഹ്മാൻ, മോഹൻ റാം എന്നിവരും ഈ ചിത്രത്തിൽ അഭിനയിച്ചിട്ടുണ്ട്. കൽക്കി കൃഷ്ണമൂർത്തി എഴുതിയ, പൊന്നിയിൻ സെൽവനെന്ന അഞ്ചു ഭാഗങ്ങൾ ഉള്ള ബ്രഹ്മാണ്ഡ നോവലിനെ അടിസ്ഥാനമാക്കിയാണ് ഈ ചിത്രം ഒരുക്കിയിരിക്കുന്നത്. മണി രത്‌നത്തിന്റെ മദ്രാസ് ടാകീസ്, ലൈക്ക പ്രൊഡക്ഷൻസ് എന്നിവർ ചേർന്ന് നിർമ്മിച്ച ഈ ചിത്രത്തിനു സംഗീതമൊരുക്കിയത് എ ആർ റഹ്മാൻ, ക്യാമറ ചലിപ്പിച്ചത് രവി വർമ്മൻ, എഡിറ്റ് ചെയ്തിരിക്കുന്നത് ശ്രീകർ പ്രസാദ് എന്നിവരാണ്.