അമ്മിണിപ്പിള്ളയുടെയും രുഗ്മിണിയുടെയും പ്രണയവുമായി ഒരു തെക്കൻ തല്ല് കേസിലെ പുത്തൻ ഗാനം ; വീഡിയോ കാണാം

ജനപ്രിയ താരം ബിജു മേനോൻ നായകനായി എത്തുന്ന ഏറ്റവും പുതിയ ചിത്രമായ ഒരു തെക്കൻ തല്ല് കേസ് സെപ്റ്റംബർ എട്ടിന് റിലീസ് ചെയ്യുകയാണ്. പ്രേക്ഷകർ ഏറെ ആകാംഷയോടെ കാത്തിരിക്കുന്ന ഈ ഓണ ചിത്രം ജി.ആർ. ഇന്ദുഗോപൻ രചിച്ച അമ്മിണിപ്പിള്ള വെട്ടുകേസ് എന്ന പുസ്തകത്തെ അധികരിച്ചു കൊണ്ട് രാജേഷ് പിന്നാടൻ തിരക്കഥ രചിച്ച ചിത്രമാണ്. നവാഗതനായ ശ്രീജിത്ത് എൻ സംവിധാനം ചെയ്ത ഈ ചിത്രം, ന്യൂ സൂര്യ ഫിലിംസിന്റെ ബാനറിൽ സുനിൽ എ കെയും, ഇ ഫോർ എന്റർടെയ്ൻമെന്റിന്റെ ബാനറിൽ മുകേഷ് ആർ. മേത്തയും സി.വി. സാരഥിയും ചേർന്നാണ് നിർമ്മിച്ചിരിക്കുന്നത്. ഇതിന്റെ ടീസർ, ട്രൈലെർ, ഇതിലെ ഗാനങ്ങളെന്നിവ വലിയ പ്രേക്ഷക ശ്രദ്ധ നേടിയത് ചിത്രത്തിന് മേലുള്ള പ്രതീക്ഷകൾ വർധിപ്പിച്ചിട്ടുണ്ട്. ഇപ്പോഴിതാ, ഇതിലെ പുതിയ ഗാനം കൂടി പുറത്തു വന്നിരിക്കുകയാണ്.

പാതിരയിൽ എന്ന വരികളോടെ തുടങ്ങുന്ന ഈ ഗാനം ഒരു പ്രണയ ഗാനമായാണ് ഒരുക്കിയിരിക്കുന്നതെന്ന് ഇതിന്റെ ലിറിക്കൽ വീഡിയോ സൂചിപ്പിക്കുന്നു. അൻവർ അലി വരകൾ രചിച്ച ഈ ഗാനമാലപിച്ചത് ശ്രീദേവി തെക്കേടത്തും ഇതിനു സംഗീതം നൽകിയിരിക്കുന്നത് ജസ്റ്റിൻ വർഗീസുമാണ്. ആക്ഷൻ, കോമഡി, പ്രണയം, ത്രില്ലിങ്ങായ നിമിഷങ്ങൾ എന്നിവയെല്ലാം കൂട്ടിയിണക്കിയ ഒരു കംപ്ലീറ്റ് ഉത്സവകാല വിനോദ ചിത്രമാണ് ഒരു തെക്കൻ തല്ല് കേസ് എന്നാണ് ഇതിന്റെ ട്രൈലെർ നൽകുന്ന സൂചന. ബിജു മേനോൻ കൂടാതെ റോഷൻ മാത്യു, പത്മപ്രിയ, നിമിഷ സജയൻ, അഖിൽ കവലയൂർ, അശ്വത് ലാൽ, റിജു ശിവദാസ്, അരുൺ പാവുമ്പ, അസീസ് നെടുമങ്ങാട്, പ്രമോദ് വെളിയനാട്, പ്രശാന്ത് മുരളി, അച്യുതാന്ദൻ, ശശി വാളൂരാൻ, നീരജ രാജേന്ദ്രൻ, ജയരാജ് എന്നിവരും വേഷമിട്ടിരിക്കുന്ന ഈ ചിത്രത്തിന് ക്യാമറ ചലിപ്പിച്ചത് മധു നീലകണ്ഠൻ, എഡിറ്റ് ചെയ്തത് മനോജ് കണ്ണോത് എന്നിവരാണ്. അമ്മിണിപ്പിള്ള എന്ന കഥാപാത്രമായി ബിജു മേനോനെത്തുമ്പോൾ രുഗ്മിണി എന്ന കഥാപാത്രമായാണ് ഇതിൽ പദ്മപ്രിയ അഭിനയിച്ചിരിക്കുന്നത്.