മാസ്സ് ആക്ഷൻ ഹീറോ ലുക്കിൽ കിംഗ് ഖാൻ; പത്താനിലെ പുത്തൻ വീഡിയോ കാണാം

ബോളിവുഡിന്റെ കിംഗ് ഖാൻ എന്നറിയപ്പെടുന്ന ഷാരൂഖ് ഖാൻ നായകനായി എത്തുന്ന പുതിയ ചിത്രങ്ങളിൽ ഒന്നാണ് പത്താൻ. അടുത്ത വർഷം ജനുവരി ഇരുപത്തിയഞ്ചിനാണ് ഈ മാസ്സ് ആക്ഷൻ ത്രില്ലർ റിലീസ് ചെയ്യാൻ പോകുന്നത്. സിദ്ധാർഥ് ആനന്ദ് ഒരുക്കിയ ഈ ചിത്രത്തിന്റെ ഒഫീഷ്യൽ റിലീസ് ഡേറ്റ് പുറത്തു വിട്ടു കൊണ്ടുള്ള ടീസർ സോഷ്യൽ മീഡിയയിൽ തരംഗമായി മാറിയിരുന്നു. ഇപ്പോഴിതാ ഇതിന്റെ പുത്തൻ മോഷൻ പോസ്റ്റർ റിലീസ് ചെയ്തിരിക്കുകയാണ്. മാസ്സ് ആക്ഷൻ ഹീറോ ലുക്കിൽ ഷാരൂഖ് ഖാനെ കാണിച്ചിരിക്കുന്ന ഈ വീഡിയോ പോസ്റ്റർ സമൂഹ മാധ്യമങ്ങളിൽ മുഴുവൻ ട്രെൻഡ് ചെയ്യുന്നതാണ് നമ്മുക്ക് കാണാൻ സാധിക്കുന്നത്. ഷാരൂഖ് ഖാൻ സിനിമയിൽ വന്നിട്ട് 30 വർഷമായതിന്റെ ഭാഗമായാണ് ഈ വീഡിയോ പുറത്തു വിട്ടിരിക്കുന്നത്. കിംഗ് ഖാന്റെ വമ്പൻ തിരിച്ചു വരവായിരിക്കും ഈ ചിത്രമെന്നാണ് ആരാധകരും സിനിമാ പ്രേമികളും കരുതുന്നത്. ഒരു സ്പൈ ആയാണ് ഷാരൂഖ് ഖാൻ ഇതിലഭിനയിച്ചിരിക്കുന്നതെന്നാണ് സൂചന.

ഹിന്ദി, തമിഴ്, തെലുങ്ക് ഭാഷകളിൽ ഒരുക്കുന്ന പത്താൻ വാർ എന്ന സൂപ്പർ ഹിറ്റ് ഹൃത്വിക് റോഷൻ- ടൈഗർ ഷെറോഫ് ചിത്രത്തിന് ശേഷം സിദ്ധാർത്ഥ് ആനന്ദ് സംവിധാനം ചെയ്യുന്ന ചിത്രം കൂടിയാണ്. യാഷ് രാജ് ഫിലിംസ് നിർമ്മിക്കുന്ന ഈ ചിത്രം അവരുടെ അന്പതാമത്തെ നിർമ്മാണ സംരംഭം കൂടിയാണ്. ബോളിവുഡ് സൂപ്പർ താരം ജോണ് അബ്രഹാം വില്ലൻ വേഷം ചെയുന്ന ഈ ചിത്രത്തിലെ നായികാ വേഷം ചെയ്യുന്നത് ദീപിക പദുക്കോണാണ്. സൂപ്പർ താരം സൽമാൻ ഖാൻ, ടൈഗർ എന്ന തന്റെ പ്രശസ്ത സ്പൈ കഥാപാത്രം ആയി പത്താനിൽ അതിഥി വേഷത്തിലെത്തുന്നുണ്ടെന്നതാണ് ഈ ചിത്രത്തിന്റെ മറ്റൊരു സവിശേഷത. പത്താൻ കൂടാതെ, ആറ്റ്ലി ഒരുക്കുന്ന ജവാൻ, രാജ് കുമാർ ഹിറാനി സംവിധാനം ചെയ്യാൻ പോകുന്ന ഡങ്കി എന്നിവയാണ് അടുത്ത വർഷം റിലീസ് ചെയ്യാൻ പോകുന്ന ഷാരുഖ് ഖാൻ ചിത്രങ്ങൾ.