ഹൃദയം കവർന്നു ദുൽഖറിന്റെ കുറുപ്പിലെ ആദ്യ ഗാനം; വീഡിയോ കാണാം..!

യുവ താരം ദുൽഖർ സൽമാൻ നായകനായി എത്തുന്ന പുതിയ ചിത്രമാണ് കുറുപ്പ്. നവംബർ 12 നു ആഗോള റിലീസ് ആയി എത്തുന്ന ഈ ചിത്രം ദുൽഖർ സൽമാന്റെ കരിയറിലെ തന്നെ ഏറ്റവും വലിയ ചിത്രവുമാണ്. ദുൽഖർ അരങ്ങേറ്റം കുറിച്ച സെക്കന്റ് ഷോ എന്ന ചിത്രം ഒരുക്കിയ ശ്രീനാഥ് രാജേന്ദ്രൻ ആണ് ഈ ചിത്രവും സംവിധാനം ചെയ്തിരിക്കുന്നത്. ഇതിന്റെ നിർമ്മാണം നിർവഹിച്ചിരിക്കുന്നതും ദുൽഖർ തന്നെയാണ്. കോവിഡ് രണ്ടാം തരംഗം കഴിഞ്ഞു തീയേറ്ററുകൾ തുറന്നതിനു ശേഷം കേരളത്തിൽ റിലീസ് ചെയ്യുന്ന ആദ്യത്തെ വലിയ മലയാള ചിത്രമായിരിക്കും കുറുപ്പ്. ഈ ചിത്രത്തിന്റെ ടീസർ, ട്രൈലെർ എന്നിവ മികച്ച പ്രേക്ഷക ശ്രദ്ധ നേടിയെടുത്തിട്ടുണ്ട്. എന്നാൽ ഇപ്പോൾ പുറത്തു വന്നിരിക്കുന്നത് ഇതിലെ മനോഹരമായ ഒരു ഗാനമാണ്. പകലിരവുകൾ എന്ന് തുടങ്ങുന്ന ഈ മെലഡി ആലപിച്ചിരിക്കുന്നത് നേഹ നായർ ആണ്. അതിമനോഹരമായ ഈ ഗാനം ഇപ്പോഴേ പ്രേക്ഷകരുടെ മനസ്സ് കീഴടക്കി എന്നാണ് ആദ്യ പ്രതികരണങ്ങൾ സൂചിപ്പിക്കുന്നത്. അൻവർ അലിയാണ് ഈ ഗാനം രചിച്ചിരിക്കുന്നത്.

കേരളത്തിലെ കുപ്രസിദ്ധ പിടികിട്ടാപ്പുള്ളി ആയ സുകുമാര കുറുപ്പിന്റെ ജീവതകഥ പറയുന്ന ഈ ചിത്രം രചിച്ചിരിക്കുന്നത് കെ എസ് അരവിന്ദ്, ഡാനിയൽ സായൂജ് നായർ എന്നിവർ ചേർന്നാണ്. ദുൽഖർ സൽമാനെ കൂടാതെ ടോവിനോ തോമസ്, സണ്ണി വെയ്ൻ, ഇന്ദ്രജിത് സുകുമാരൻ, ഷൈൻ ടോം ചാക്കോ എന്നിവരും അഭിനയിച്ച ഈ ചിത്രത്തിന് സംഗീതം ഒരുക്കിയിരിക്കുന്നത് സുഷിൻ ശ്യാം ആണ്. ഒന്നിലധികം ഭാഷകളിൽ ആയാണ് കുറുപ്പ് റിലീസ് ചെയ്യുന്നത്. നിമിഷ് രവി ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് വിവേക് ഹർഷൻ ആണ്. ശോഭിത ധുലിപാല, ഭരത്, സുരഭി ലക്ഷ്മി, ആനന്ദ് ബാൽ, എം ആർ ഗോപകുമാർ, ശിവജിത് പദ്മനാഭൻ, ബിബിൻ പെരുമ്പിള്ളിക്കുന്നേൽ എന്നിവരും ഈ ചിത്രത്തിൽ അഭിനയിച്ചിട്ടുണ്ട്.