സോഷ്യൽ മീഡിയയിൽ വീണ്ടും തരംഗം സൃഷ്ടിക്കാൻ പ്രിയാ വാര്യർ; ഒരു അഡാർ ലൗന്റെ തമിഴ് സോങ് ടീസർ കാണാം..

ആദ്യ ചിത്രങ്ങൾ കൊണ്ട് തന്നെ മലയാളത്തിൽ ശ്രദ്ധേയനായ സംവിധായകനാണ് ഒമർ ലുലു. ഒമർ ലുലു സംവിധാനം ചെയ്ത ഒരു അഡാർ ലൗ ഇതിനോടകം തന്നെ ലോക ശ്രദ്ധ നേടിക്കഴിഞ്ഞു. ചിത്രത്തിലേതായി ആദ്യം പുറത്തിറങ്ങിയ മണിക്യ മലരായ എന്നുതുടങ്ങുന്ന ഗാനമാണ് ചിത്രത്തെ ഇത്രമേൽ ലോക ശ്രദ്ധയിലേക്ക് എത്തിച്ചത് എന്ന് പറയാം. ഗാനത്തിലെ പ്രിയ വാര്യരുടെ കണ്ണിറുക്കൽ രംഗങ്ങൾ സോഷ്യൽ മീഡിയയിൽ വൻ തരംഗമാണ് സൃഷ്ടിച്ചത്. പിന്നീട് പ്രിയയേയും ചിത്രത്തേയും തിരഞ്ഞു ലോകമെമ്പാടുമുള്ള ആരാധകരും എത്തി. ഒറ്റ ദിവസം കൊണ്ട് താരമായ പ്രിയ അതിവേഗം ഇൻസ്റ്റാഗ്രാമിൽ ഫോളോവേഴ്സിനെ ഉണ്ടാക്കുന്ന താരവുമായി മാറി. പിന്നീട് എത്തിയ ചിത്രത്തിന്റെ ടീസറും ആദ്യ ഗാനം പോലെ തന്നെ വലിയ തരംഗമായിരുന്നു .

ഇപ്പോഴിതാ ചിത്രത്തിന്റെ പുതിയ സോങ് ടീസർ കൂടി എത്തി. ഏവരും ഉറ്റു നോക്കുന്ന ചിത്രം ആയതിനാൽ തന്നെ ചിത്രം മറ്റ് ഭാഷകളിൽ കൂടിയാണ് ഒരുക്കുന്നത്. തമിഴ്, തെലുങ്ക്, ഹിന്ദി തുടങ്ങി നിരവധി ഭാഷകളിൽ ഒരുക്കുന്ന ചിത്രത്തിലെ ഒരു തമിഴ് സോങ് ടീസർ ആണ് ഇപ്പൊ പുറത്ത് വന്നത്. മുന്നാലെ പോനാലെ എന്ന് തുടങ്ങുന്ന ഗാനത്തിനു ഈണം നൽകിയിരിക്കുന്നത് ഷാൻ റഹ്‌മാൻ തന്നെയാണ്. പ്രിയ വാര്യരും റോഷനും ഒന്നിച്ചുള്ള പ്രണയ രംഗങ്ങൾ ഉള്ളൊരു ഗാനം തന്നെയാണ് ഇതും. തമിഴ് പ്രേക്ഷകർക്ക് ഗാനം ഏറെ പ്രിയങ്കരമാകുമെന്ന് കരുതുന്നു. ചിത്രത്തിന്റെ അന്യഭാഷാ പതിപ്പുകൾ ഇതിനോടകം തന്നെ വലിയ തുകയ്ക്ക് വിറ്റ് പോയിരുന്നു. ചിത്രം സെപ്റ്റംബറിൽ തീയറ്ററുകളിലെത്തും.