മുന്തിരി മൊഞ്ചനിലെ ഗാനം സൂപ്പർ ഹിറ്റാവുന്നു; ശങ്കർ മഹാദേവന്റെ സ്വരത്തിൽ ഒരു മനോഹര ഗാനം..!

പുതുമുഖ സംവിധായകൻ ആയ വിജിത് നമ്പ്യാർ പുതുമുഖങ്ങളെ കേന്ദ്ര കഥാപാത്രങ്ങളാക്കി സംവിധാനം ചെയ്ത ചിത്രമാണ് മുന്തിരി മൊഞ്ചൻ. ഒരു മ്യൂസിക്കൽ- റൊമാന്റിക് കോമഡി ആയി ഒരുക്കിയിരിക്കുന്ന ഈ ചിത്രത്തിലെ ഒരു ഗാനം ഇപ്പോൾ സോഷ്യൽ മീഡിയ ഏറ്റെടുക്കുകയാണ്. പ്രശസ്ത ഗായകൻ ശങ്കർ മഹാദേവൻ പാടിയ “ഓർക്കുന്നു ഞാൻ” എന്ന വരികളോടെ തുടങ്ങുന്ന ഗാനമാണ് ഇപ്പോൾ പ്രേക്ഷകർ ഏറ്റെടുക്കുന്നത്. സംവിധായകനായ വിജിത നമ്പ്യാർ തന്നെയാണ് ഈ ചിത്രത്തിന്റെ സംഗീത സംവിധാനവും നിർവഹിച്ചിരിക്കുന്നത്. മനേഷ് കൃഷ്ണൻ, ഗോപിക അനിൽ എന്നിവർ ആണ് ഈ ചിത്രത്തിലെ നായകനും നായികയും ആയി എത്തുന്നത്.

ഒരു തവള പറഞ്ഞ കഥ എന്നതാണ് ഈ ചിത്രത്തിന്റെ ടാഗ് ലൈൻ. സലിം കുമാർ, ഇന്നസെന്റ്, ഇർഷാദ്, നിയാസ് ബക്കർ, ഇടവേള ബാബു, അഞ്ജലി നായർ, വിഷ്ണു നമ്പ്യാർ തുടങ്ങി ഒട്ടേറെ നടീനടന്മാർ ഈ ചിത്രത്തിന്റെ താര നിരയുടെ ഭാഗം ആണ്. പി കെ അശോകൻ ആണ് വിശ്വാസ് മൂവി പ്രൈവറ്റ് ലിമിറ്റഡ് എന്ന ബാനറിൽ ഈ ചിത്രം നിർമ്മിച്ചിരിക്കുന്നത്. മനു ഗോപാൽ, മൊഹറലി പോയിലുങ്ങൽ എന്നിവർ ചേർന്ന് രചന നിർവഹിച്ചിരിക്കുന്ന ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത് ഷാൻ ഹാഫ്സാലി ആണ്. റിജോഷ് പശ്ചാത്തല സംഗീതം ഒരുക്കിയ ഈ ചിത്രം അനസ് ആണ് എഡിറ്റ് ചെയ്തിരിക്കുന്നത്. റഫീഖ് അഹമ്മദ് വരികൾ രചിച്ചിരിക്കുന്ന ഈ ചിത്രത്തിലെ ഗാനം പ്രേക്ഷകർ ഏറ്റെടുത്തു കഴിഞ്ഞു.