മിഖായേൽ പുതിയ ട്രെയ്‌ലർ എത്തി; വിജയ കുതിപ്പ് തുടർന്ന് നിവിൻ പോളി ചിത്രം..!

 യുവ താരം നിവിൻ പോളി നായക വേഷത്തിൽ എത്തിയ മിഖായേൽ എന്ന ചിത്രം ഈ കഴിഞ്ഞ ജനുവരി പതിനെട്ടിന് ആണ് കേരളത്തിൽ റിലീസ് ചെയ്തത്. ഹനീഫ് അദനി സംവിധാനം ചെയ്ത ഈ ചിത്രം ആദ്യ ഷോ മുതൽ മികച്ച മാസ്സ് ആക്ഷൻ ത്രില്ലെർ എന്ന പ്രേക്ഷകഭിപ്രായം ആണ് നേടി എടുത്തത്.  ആദ്യ നാല് ദിനം കൊണ്ട് വേൾഡ് വൈഡ് കളക്ഷൻ ആയി പത്തു കോടിക്ക് മുകളിൽ ഈ ചിത്രം നേടിയെന്ന റിപ്പോർട്ട് അണിയറ പ്രവർത്തകർ പുറത്തു വിട്ടിരുന്നു. രണ്ടാം വാരത്തിലും മികച്ച പ്രേക്ഷക പിന്തുണ നേടി ഹൌസ് ഫുൾ ഷോകളോടെ ആണ് മിഖായേൽ കുതിക്കുന്നത്. ഇന്ന് ഈ ചിത്രത്തിന്റെ പുതിയ ഒരു ട്രയ്ലർ കൂടി റിലീസ് ആയിരിക്കുകയാണ്. കിടിലൻ ആക്ഷൻ രംഗങ്ങളും, പഞ്ച് ഡയലോഗുകളും ത്രില്ലടിപ്പിക്കുന്ന സംഗീതവുമൊക്കെയാണ് ഈ മാസ്സ് ചിത്രത്തിന്റെ ഹൈലൈറ്റ്. അതോടൊപ്പം കുടുംബ ബന്ധങ്ങളും ഈ ചിത്രത്തിന്റെ കഥയുടെ ഭാഗം ആണ്.

ഹനീഫ് അദനി തന്നെ രചന നിർവ്വഹിച്ച ഈ ത്രില്ലർ ചിത്രത്തിൽ യുവ താരം ഉണ്ണി മുകുന്ദൻ ആണ് വില്ലൻ വേഷത്തിൽ അഭിനയിച്ചിരിക്കുന്നത്. ആന്റോ ജോസെഫ് ഫിലിം കമ്പനിയുടെ ബാനറിൽ ആന്റോ ജോസെഫ് നിർമ്മിച്ച ഈ ചിത്രത്തിലെ നായികാ വേഷം ചെയ്തിരിക്കുന്നത് പ്രശസ്ത നടി മഞ്ജിമ മോഹൻ ആണ്. ഇവരോടൊപ്പം സിദ്ദിഖ്, ജെ ഡി ചക്രവർത്തി. സുരാജ് വെഞ്ഞാറമ്മൂട്, സുദേവ് നായർ, കലാഭവൻ ഷാജോൺ, ബൈജു, ബാബു ആന്റണി, ശാന്തി കൃഷ്ണ, കെ പി എ സി ലളിത, കിഷോർ, ജയപ്രകാശ് തുടങ്ങി ഒട്ടേറെ താരങ്ങൾ ഈ ചിത്രത്തിൽ പ്രാധാന്യമുള്ള വേഷങ്ങൾ ചെയ്തിരിക്കുന്നു. ഗോപി സുന്ദർ ഗാനങ്ങളും പശ്ചാത്തല സംഗീതവും ഒരുക്കിയ മിഖായേലിന് വേണ്ടി ദൃശ്യങ്ങൾ ഒരുക്കിയത് വിഷ്ണു പണിക്കരും എഡിറ്റിങ് നിർവഹിച്ചത് മഹേഷ് നാരായണനും ആണ്.