ജോജു ജോർജിന്റെ ജോസഫിലെ പുതിയ ഗാനം എത്തി; റിലീസ് ചെയ്തത് ആഷിഖ് അബു..!

ജോജു ജോർജിന്റെ നായകനാക്കി എം പദ്മകുമാർ സംവിധാനം ചെയ്ത പുതിയ ചിത്രമാണ് ജോസഫ്. വരുന്ന വെള്ളിയാഴ്ച റിലീസിന് തയ്യാറെടുക്കുന്ന ഈ ചിത്രം അതിന്റെ വ്യത്യസ്തമായ പോസ്റ്ററുകൾ കൊണ്ടും ഗംഭീര ടീസർ കൊണ്ടും ഇപ്പോഴേ പ്രേക്ഷക ശ്രദ്ധ നേടിയെടുത്തിട്ടുണ്ട്. ഇതുവരെ പുറത്തു വന്നിട്ടുള്ള ഈ ചിത്രത്തിലെ ഗാനങ്ങളും ഏറെ ശ്രദ്ധ നേടിയെടുത്തിട്ടുണ്ട്. ഇപ്പോഴിതാ ഈ ചിത്രത്തിലെ പുതിയ ഗാനം റിലീസ് ചെയ്തിരിക്കുകയാണ്. പ്രശസ്ത സംവിധായകൻ ആഷിഖ് അബു ആണ് ഈ പുതിയ ഗാനം റിലീസ് ചെയ്തത്. “കരിനീലകണ്ണുള്ള പെണ്ണ്” എന്നു തുടങ്ങുന്ന ഗാനം ഒരുക്കിയിരിക്കുന്നത് രെഞ്ജിൻ രാജ് ആണ്.

ബി കെ ഹരിനാരായണൻ വരികൾ എഴുതിയിരിക്കുന്ന ഈ ഗാനം ആലപിച്ചിരിക്കുന്നത് കാർത്തിക്, അഖില ആനന്ദ് എന്നിവർ ചേർന്നാണ്. അപ്പു പാത്തു പപ്പു പ്രൊഡക്ഷൻ ഹൗസിന്റെ ബാനറിൽ ജോജു ജോർജ് തന്നെയാണ് ഈ ചിത്രം നിർമ്മിച്ചിരിക്കുന്നത്. ജോസഫിലെ ഓരോ പാട്ടും ഒന്നിനൊന്ന് മികവോടെയാണ് പുറത്തു വരുന്നത്. ക്രിസ്ത്യൻ പശ്ചാത്തലത്തിൽ മാർഗംകളിയുടെ ഈണവുമായി ചേർത്ത് ഒരുക്കിയിരിക്കുന്ന പുതിയ പാട്ടിനു മികച്ച പ്രേക്ഷക പ്രതികരണം ആണ് ലഭിക്കുന്നത്. ഒരു പക്കാ ഫാമിലി ത്രില്ലെർ ആയി ഒരുക്കിയിരിക്കുന്ന ജോസെഫ് രചിച്ചിരിക്കുന്നത് ഷാഹി കബീറും ഇതിനു ദൃശ്യങ്ങൾ ഒരുക്കിയത് മനേഷ് മാധവനും ആണ്. കിരൺ ദാസ് ആണ് ഈ ചിത്രത്തിന്റെ എഡിറ്റർ. യുവ താരം നിവിൻ പോളി ആണ് ജോസെഫിലെ ഉയിരിൻ നാഥനെ എന്ന ഗാനം റിലീസ് ചെയ്തത്. ജോജു ജോര്ജും ഈ ചിത്രത്തിൽ ഒരു ഗാനം ആലപിച്ചിട്ടുണ്ട്.