കെ.ജി.എഫും പുഷ്പയും ഒന്നിച്ചൊരു ഐറ്റം; നാനിയുടെ ദസറ സ്പാർക് വീഡിയോ കാണാം..!

തെലുങ്കു താരം നാനിയും കീര്‍ത്തി സുരേഷും പ്രധാന കഥാപാത്രങ്ങളാകുന്ന തമിഴ് ചിത്രം ദസറയുടെ പുത്തൻ പ്രോമോ വീഡിയോ ആണ് ഇപ്പോൾ സോഷ്യൽ മീഡിയയിൽ വൈറൽ ആവുന്നത്. സ്പാര്‍ക്ക് വീഡിയോ എന്ന പേരിൽ പുറത്തു വന്നിരിക്കുന്ന ഈ വീഡിയോയിൽ, തന്റെ കരിയറിൽ ഇതുവരെ ചെയ്തതില്‍ നിന്നും തികച്ചും വ്യത്യസ്തമായ ഗെറ്റപ്പിലാണ് നാനി എത്തിയിരിക്കുന്നത്. കെ.ജി.എഫും പുഷ്പയും ഒന്നിച്ചൊരു വേര്‍ഷന്‍ എന്നാണ് വീഡിയോയ്ക്ക് ആരാധകർ നൽകുന്ന കമന്റ്. എസ്.എല്‍.വി സിനിമാസ് എന്ന യൂട്യൂബ് ചാനലിലൂടെയാണ് വീഡിയോ റിലീസ് ചെയ്തിരിക്കുന്നത്. ശ്രീകാന്ത് ഒഡേലയാണ് ഈ ബിഗ് ബഡ്ജറ്റ് ചിത്രത്തിന്റെ സംവിധാനം നിര്‍വഹിക്കുന്നത്. സമുദ്രക്കനി, സായ് കുമാര്‍, സറീന വഹാബ് എന്നിവരും അഭിനയിക്കുന്ന ഈ ചിത്രം ശ്രീ ലക്ഷ്മി വെങ്കടേശ്വര സിനിമാസിന്റെ ബാനറില്‍ സുധാകര്‍ ചെറുകൂറി ആണ് നിർമ്മിക്കുന്നത്.

സത്യൻ സൂര്യൻ കാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് സന്തോഷ് നാരായണൻ ആണ്. നവീൻ നൂലി ആണ് ഈ ചിത്രത്തിന്റെ എഡിറ്റർ. എ. എസ്. ദിനേശ്, ശബരി എന്നിവരാണ് ഈ ചിത്രത്തിന്റെ പി ആർ ഓ ആയി ജോലി ചെയ്യുന്നത്. ശ്യാം സിംഘ റോയിയാണ് അവസാനമായി ഇറങ്ങിയ നാനിയുടെ. സായി പല്ലവി നായികാ വേഷം ചെയ്ത ഈ ചിത്രം ശ്രദ്ധ നേടിയിരുന്നു. ഇതു കൂടാതെ ദളപതി വിജയ് നായകനായി എത്തുന്ന തമിഴ്- തെലുങ്ക് ദ്വിഭാഷാ ചിത്രത്തിൽ നാനിയും ഉണ്ടാകുമെന്നു സ്ഥിതീകരിക്കാത്ത റിപ്പോർട്ടുകൾ വന്നിരുന്നു. ഏതായാലും ദസറയിൽ നാനി എത്തിയിരിക്കുന്ന കിടിലൻ ലുക്ക് ഇപ്പോൾ സോഷ്യൽ മീഡിയയിൽ വൈറൽ ആയി മാറുകയാണ്.