മെഗാസ്റ്റാർ ചിത്രത്തിന്റെ പൂജ ചടങ്ങിൽ സർപ്രൈസ് എന്ട്രി നടത്തി മോഹൻലാൽ..!

മമ്മൂട്ടിയെ നായകനാക്കി രമേഷ് പിഷാരടി സംവിധാനം ചെയ്യുന്ന ഗാനഗന്ധർവ്വന്റെ ചിത്രീകരണം ഇന്ന് നടന്ന പൂജ ചടങ്ങോടെ ആരംഭിച്ചു. എന്നാൽ അവിടെയും താരം ആയി മാറിയത് ഒരു കിടിലൻ സർപ്രൈസ് എൻട്രി നടത്തിയ മോഹൻലാൽ ആണ്. ഇന്ന് ഗാനഗന്ധർവൻ പൂജ ചടങ്ങു നടക്കുന്നതിനിടയിൽ ആണ് ജിമ്മിലേക്കു പോയ മോഹൻലാൽ അതു വഴി കടന്നു പോയത്. അദ്ദേഹം രമേശ് പിഷാരടിയെ കാണുകയും കൈ കൊടുക്കുകയും ചെയ്തിട്ടാണ് പിന്നീട് ജിമ്മിലേക്കു പോയത്. ജിം ഡ്രെസ്സിൽ അവിടെ വന്നു പോകുന്ന മോഹൻലാലിന്റെ വീഡിയോ ഇപ്പോൾ സോഷ്യൽ മീഡിയയിൽ വൈറൽ ആയി കഴിഞ്ഞു.

ഗാനമേള പാട്ടുകാരനായ കലാസദൻ ഉല്ലാസായി മമ്മൂട്ടി വേഷമിടുന്ന ഗാനഗന്ധർവ്വനിൽ പുതുമുഖം വന്ദിതയാണ് നായിക ആയി എത്തുന്നത്. രമേഷ് പിഷാരടിയും ഹരി.പി നായരും ചേർന്ന് കഥയും തിരക്കഥയും സംഭാഷണവും ഒരുക്കിയിരിക്കുന്ന ഗാനഗന്ധർവ്വനിൽ മുകേഷ്, ഇന്നസെന്റ്, സിദ്ദിഖ്, സലിം കുമാർ, ധർമജൻ ബോൾഗാട്ടി ,ഹരീഷ് കണാരൻ , മനോജ് .കെ .ജയൻ ,സുരേഷ് കൃഷ്ണ, മണിയൻ പിള്ള രാജു, കുഞ്ചൻ, അശോകൻ, സുനിൽ സുഖദ, അതുല്യ, ശാന്തി പ്രിയ തുടങ്ങിയവർ പ്രധാന വേഷങ്ങളിൽ എത്തുന്നു. പ്രശസ്ത ക്യാമറാമാൻ അഴകപ്പൻ ഛായാഗ്രഹണവും ലിജോ പോൾ എഡിറ്റിoഗും നിർവഹിക്കുന്ന ഗാനഗന്ധർവ്വന് ഗാനങ്ങൾ ഒരുക്കുന്നത് ദീപക് ദേവാണ്. ഇച്ചായീസ് പ്രൊഡക്ഷൻസും രമേഷ് പിഷാരടി എന്റർടൈൻമെൻറ്സും ചേർന്നൊരുക്കുന്ന ഗാനഗന്ധർവ്വന്റെ നിർമാണം നിർവഹിക്കുന്നത് ശ്രീലക്ഷ്മി, ശങ്കർ രാജ്, സൗമ്യ രമേഷ് എന്നിവരാണ്. ജയറാം- കുഞ്ചാക്കോ ബോബൻ കൂട്ടുകെട്ടിൽ ഒരുങ്ങിയ പഞ്ചവർണ്ണതത്ത ആണ് രമേഷ്‌ പിഷാരടിയുടെ ആദ്യ ചിത്രം.