ആരാധകരെ ത്രസിപ്പിച്ചു കൊണ്ട് രണത്തിന്റെ കിടിലൻ ട്രൈലെർ; റിലീസ് ചെയ്തത് മോഹൻലാൽ..!

പൃഥ്വിരാജ് ആരാധകരും സിനിമാ പ്രേമികളും ഒരുപോലെ കാത്തിരിക്കുന്ന ചിത്രമാണ് രണം. നവാഗതനായ നിർമ്മൽ സഹദേവ് എഴുതി സംവിധാനം ചെയ്ത ഈ ചിത്രം ഏറെ കാത്തിരിപ്പിനൊടുവിൽ അടുത്ത മാസം ആറാം തീയതിയാണ് റിലീസ് ചെയ്യുന്നത്. ഇപ്പോൾ ഈ ചിത്രത്തിന്റെ ട്രൈലെർ റിലീസ് ചെയ്തിരിക്കുകയാണ്. ഇന്ത്യൻ സിനിമയുടെ കമ്പ്ലീറ്റ് ആക്ടർ ആയ മോഹൻലാൽ ആണ് തന്റെ ഫേസ്ബുക് പേജിലൂടെ ഈ പൃഥ്വിരാജ് ചിത്രത്തിന്റെ ട്രൈലെർ റിലീസ് ചെയ്തത്. ഒറ്റ വാക്കിൽ ഗംഭീരം എന്ന് വിശേഷിപ്പിക്കാവുന്ന ഒരു ട്രൈലെർ ആണ് അണിയറ പ്രവർത്തകർ ഈ ചിത്രത്തിനായി ഒരുക്കിയിരിക്കുന്നത്. ഒരു പക്കാ ക്രൈം ആക്ഷൻ ഡ്രാമ ആയാണ് രണം ഒരുക്കിയിരിക്കുന്നത് എന്ന് ട്രൈലറിൽ നിന്ന് വ്യക്തം ആണ് . കിടിലൻ ആക്ഷൻ രംഗങ്ങളും മാസ്സ് സീനുകളും കൊണ്ട് സമ്പന്നമാണ് രണമെന്ന സൂചനയും ട്രൈലെർ തരുന്നുണ്ട്.

ഹോളിവുഡ് സിനിമകളെ അനുസ്മരിപ്പിക്കുന്ന ദൃശ്യ മികവാണ് ഈ ചിത്രത്തിന്റെ പ്രത്യേകതയെന്ന് ട്രൈലെർ നമ്മളോട് പറയുന്നു. ജിഗ്മെ ടെൻസിങ് ആണ് ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത്. അതുപോലെ തന്നെ എടുത്തു പറയേണ്ടതാണ് രണത്തിന്റെ സംഗീതത്തെ കുറിച്ച്. ഇതിലെ തീം സോങ് ഇപ്പോഴേ സൂപ്പർ ഹിറ്റാണ്. ട്രെയിലറിലെ പശ്ചാത്തല സംഗീതവും മാസ്സ് ആണ്. ജേക്സ് ബിജോയ് ആണ് ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത്. ഏതായാലും രണത്തിന്റെ ട്രൈലെർ ആരാധകരെയും സിനിമാ പ്രേമികളെയും ത്രസിപ്പിക്കുന്നു എന്നാണ് സോഷ്യൽ മീഡിയയിൽ നിന്നുള്ള ആദ്യ പ്രതികരണങ്ങൾ സൂചിപ്പിക്കുന്നത്. ഈ കിടിലൻ ട്രൈലെർ കൂടി വന്നതോടെ രണത്തെ കുറിച്ചുള്ള പ്രേക്ഷക പ്രതീക്ഷ വളരെയധികം കൂടിയിരിക്കുകയാണ്. ആനന്ദ് പയ്യന്നൂർ, റാണി, ലോസൺ ബിജു എന്നിവർ ചേർന്ന് യെസ് സിനിമ, ലോസൺ എന്റെർറ്റൈന്മെന്റ്സ് എന്നിവയുടെ ബാനറിൽ ആണ് ഈ ചിത്രം നിർമ്മിച്ചിരിക്കുന്നത്.