മിണ്ടിയും പറഞ്ഞും ഉണ്ണി മുകുന്ദനും അപർണ ബാലമുരളിയും; ശ്രദ്ധ നേടി പുത്തൻ ഗാനം; വീഡിയോ കാണാം

മാളികപ്പുറം എന്ന പുതിയ ചിത്രത്തിന്റെ സൂപ്പർ വിജയത്തോടെ താര പദവിയിലേക്ക് ഉയർന്നിരിക്കുകയാണ് യുവനടൻ ഉണ്ണി മുകുന്ദൻ. നടനായും നിർമ്മാതാവായും ഇപ്പോൾ മലയാളത്തിൽ തിളങ്ങുന്ന ഈ താരത്തിന്റെ ഏറ്റവും പുതിയ ചിത്രങ്ങളിൽ ഒന്നായ മിണ്ടിയും പറഞ്ഞും പ്രേക്ഷകരിലേക്ക് എത്താനൊരുങ്ങുകയാണ്. ലൂക്ക എന്ന ചിത്രത്തിലൂടെ സംവിധായകനായി അരങ്ങേറ്റം കുറിച്ച അരുണ്‍ ബോസ് സംവിധാനം ചെയ്ത ഈ ചിത്രത്തിൽ അപർണ ബാലമുരളിയാണ് നായികാ വേഷം ചെയ്യുന്നത്. ഇപ്പോഴിതാ ഇതിലെ ഒരു വീഡിയോ ഗാനം റിലീസ് ചെയ്തിരിക്കുകയാണ്. നീയേ നെഞ്ചില്‍ എന്നാരംഭിക്കുന്ന ഈ ഗാനത്തിന് വരികള്‍ എഴുതിയിരിക്കുന്നത് സുജേഷ് ഹരി, ആലപിച്ചിരിക്കുന്നത് മൃദുല വാര്യര്‍, സൂരജ് എസ് കുറുപ്പ് എന്നിവരാണ്. സൂരജ് എസ് കുറുപ്പ് തന്നെയാണ് ഈ ഗാനത്തിന് ഈണം പകർന്നിരിക്കുന്നതും.

ജാഫര്‍ ഇടുക്കി, ജൂഡ് ആന്‍റണി ജോസഫ്, മാല പാര്‍വ്വതി, ഗീതി സംഗീത, സോഹന്‍ സീനുലാല്‍, ആര്‍ ജെ മുരുകന്‍, പ്രശാന്ത് മുരളി, ആതിര സുരേഷ്, ആര്‍ ജെ വിജിത, ശിവ ഹരിഹരന്‍ എന്നിവരും ഈ ചിത്രത്തിന്റെ താരനിരയിലുണ്ട്. അലന്‍സ് മീഡിയയുടെ ബാനറില്‍ സംവിധായകന്‍ സലിം അഹമ്മദ് നിര്‍മ്മിച്ചിരിക്കുന്ന ചിത്രത്തിന്‍റെ സഹനിർമ്മാതാക്കളായി എത്തിയിരിക്കുന്നത് കബീര്‍ കൊട്ടാരം, റസാക്ക് അഹമ്മദ് എന്നിവരാണ്. സംവിധായകനൊപ്പം മൃദുല്‍ ജോര്‍ജും ചേർന്ന് തിരക്കഥ രചിച്ച ഈ ചിത്രത്തിന് കാമറ ചലിപ്പിച്ചിരിക്കുന്നത് മധു അമ്പാട്ടും, ഇതിന്റെ എഡിറ്റിംഗ് നിർവഹിച്ചിരിക്കുന്നത് കിരൺ ദാസുമാണ്. ലൂക്കയിൽ നിന്നും വ്യത്യസ്തമായ ഒരു ചിത്രമാണ് ഇതെന്നാണ് സംവിധായകൻ അരുൺ ബോസ് പറയുന്നത്. ഏതായാലും ഈ ചിത്രത്തിലെ ആദ്യ ഗാനം തന്നെ പ്രേക്ഷകരുടെ ശ്രദ്ധ നേടിയെടുത്തു കഴിഞ്ഞു.