റോക്കിയുടെ പ്രണയം റീന തിരിച്ചു നൽകിയ നിമിഷം; കാത്തിരുന്ന മെഹ്ബൂബ; വീഡിയോ കാണാം..!

ഇപ്പോൾ ഇന്ത്യൻ സിനിമയിലെ തന്നെ ഏറ്റവും വലിയ വിജയങ്ങളിലൊന്നായി കുതിക്കുകയാണ് പ്രശാന്ത് നീൽ രചിച്ചു സംവിധാനം ചെയ്ത കന്നഡ ചിത്രമായ കെ ജി എഫ് ചാപ്റ്റർ 2. ആയിരം കോടിയിലധികം ആഗോള ഗ്രോസ് നേടിയ ഈ ചിത്രത്തിന്റെ ഓരോ ഭാഷാ വേർഷനും സൂപ്പർ വിജയമാണ് നേടിയത്. നാനൂറ് കോടിയിലധികമാണ് ഇതിന്റെ ഹിന്ദി വേർഷൻ മാത്രം നേടിയത്. തമിഴ്, കന്നഡ, തെലുങ്കു, ഹിന്ദി എന്നീ നാലു വേർഷനുകളും നൂറു കോടി ഗ്രോസ് നേടുന്ന ആദ്യ ഇന്ത്യൻ ചിത്രമെന്ന റെക്കോർഡും കെ ജി എഫ് 2 നേടിയെടുത്തിരുന്നു. റോക്കിങ് സ്റ്റാർ യാഷ്, ശ്രീനിഥി ഷെട്ടി എന്നിവർ നായകനും നായികയുമായെത്തിയ ഈ ചിത്രത്തിലെ ഗാനങ്ങളും സൂപ്പർ ഹിറ്റായി മാറിയിരുന്നു. ഇതിനോടകം ഇതിലെ മോൺസ്റ്റർ, ഗഗനം നീ എന്നീ ഗാനങ്ങൾ പുറത്തു വരികയും വലിയ ശ്രദ്ധ നേടുകയും ചെയ്തിട്ടുണ്ട്. ഇപ്പോഴിതാ, ഇതിലെ ഒരേയൊരു പ്രണയ ഗാനമായ മെഹ്ബൂബയുടെ വീഡിയോ റിലീസ് ചെയ്തിരിക്കുകയാണ്.

പ്രേക്ഷകർ ഏറെ ആഘോഷിച്ച റോക്കി- റീന പ്രണയ നിമിഷങ്ങളാണ് ഈ ഗാനത്തിന്റെ ഹൈലൈറ്റ്. ടി സീരിസ് മലയാളം ചാനലിലൂടെയാണ് ഗാനത്തിന്റെ മലയാളം വേര്‍ഷന്‍ റിലീസ് ചെയ്തിരിക്കുന്നത്. അഞ്ച് ഭാഷകളിലും അനന്യ ഭട്ട് ആലപിച്ചിരിക്കുന്ന ഈ ഗാനത്തിന് ഈണം പകർന്നിരിക്കുന്നത് രവി ബസ്‌റൂരാണ്. നൂറു കോടി മുതൽ മുടക്കിലാണ് ഹോംബാലെ ഫിലിംസ് ഈ ചിത്രം നിർമ്മിച്ചത്. ഇതിന്റെ ആദ്യ ഭാഗം ഇരുനൂറു കോടിക്ക് മുകളിലാണ് കളക്ഷൻ നേടിയതെങ്കിൽ, രണ്ടാം ഭാഗം അതിന്റെ അഞ്ചിരട്ടി നേടിയാണ് ചരിത്രം കുറിച്ചത്. ബോളിവുഡ് താരങ്ങളായ സഞ്ജയ് ദത്, രവീണ ടണ്ഠൻ എന്നിവരും തെന്നിന്ത്യൻ താരമായ പ്രകാശ് രാജ്, മാളവിക എന്നിവരും ഈ ചിത്രത്തിന്റെ താരനിരയിലുണ്ട്.