ജയറാം- മീര ജാസ്മിൻ ചിത്രം മകൾ; ആദ്യ ഗാനത്തിന്റെ ടീസർ സൂപ്പർ ഹിറ്റ്; വീഡിയോ കാണാം..!

സൂപ്പർ ഹിറ്റ് സംവിധായകൻ സത്യൻ അന്തിക്കാട് ഒരുക്കിയ ഏറ്റവും പുതിയ ചിത്രമായ മകൾ റിലീസിന് ഒരുങ്ങുകയാണ്. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ, ഇതിന്റെ ടീസർ എന്നിവ സോഷ്യൽ മീഡിയയിൽ വലിയ ശ്രദ്ധ നേടിയിരുന്നു. ഇപ്പോഴിതാ ഈ ചിത്രത്തിലെ ആദ്യ ഗാനത്തിന്റെ ടീസർ റിലീസ് ചെയ്തിരിക്കുകയാണ്. മായല്ലേ എന്ന വരികളോടെ തുടങ്ങുന്ന ഈ ഗാനം രചിച്ചത് ബി കെ ഹരിനാരായണൻ ആണ്. വിഷ്ണു വിജയ് സംഗീതം നൽകിയ ഈ ഗാനം ആലപിച്ചിരിക്കുന്നത് ഹരിചരൻ, വിഷ്ണു വിജയ് എന്നിവർ ചേർന്നാണ്. വളരെ രസകരമായ ഈ ടീസർ കട്ട് ഒരുക്കിയത് സത്യൻ അന്തിക്കാടിന്റെ മകനും വരനെ ആവശ്യമുണ്ട് എന്ന സൂപ്പർ ഹിറ്റ് ഒരുക്കിയ സംവിധായകനുമായ അനൂപ് സത്യൻ ആണെന്ന പ്രത്യേകതയുമുണ്ട്. ജയറാം, മീര ജാസ്മിൻ, ദേവിക സഞ്ജയ്, സിദ്ദിഖ്, ഇന്നസെന്റ്, നസ്ലെൻ എന്നിവരൊക്കെ പ്രത്യക്ഷപ്പെടുന്ന ഈ ടീസർ വളരെ രസകരമായാണ് ഒരുക്കിയിരിക്കുന്നത്.

ശ്രീനിവാസൻ, അൽത്താഫ് സലിം, ജയശങ്കർ, ഡയാന ഹമീദ്, മീര നായർ, ശ്രീധന്യ, നിൽജ ബേബി, ബാലാജി മനോഹർ എന്നിവരും അഭിനയിച്ച ഈ ചിത്രം, സെൻട്രൽ പ്രൊഡക്ഷൻസ് ആണ് നിർമ്മിച്ചിരിക്കുന്നത്. പ്രശസ്ത ഛായാഗ്രാഹകൻ എസ് കുമാർ കാമറ ചലിപ്പിച്ച മകൾ എഡിറ്റ് ചെയ്യുന്നത് ഒ രാജഗോപാൽ, ഇതിനു പശ്ചാത്തല സംഗീതം ഒരുക്കിയിരിക്കുന്നത് രാഹുൽ രാജ് എന്നിവരാണ്. ഡോക്ടർ ഇക്ബാൽ കുറ്റിപ്പുറം രചിച്ച ഈ ഫാമിലി എന്റെർറ്റൈനെറിനു മീര ജാസ്മിൻ മലയാളത്തിലേക്ക് ഒരിടവേളക്ക് ശേഷം മടങ്ങി വരുന്ന ചിത്രം കൂടിയാണെന്ന പ്രത്യേകതയുമുണ്ട് . അച്ചുവിന്റെ അമ്മ, രസതന്ത്രം, വിനോദയാത്ര, ഇന്നത്തെ ചിന്താവിഷയം എന്നീ സത്യൻ അന്തിക്കാട് ചിത്രങ്ങളിൽ ആണ് മീര ജാസ്മിൻ ഇതിനു മുൻപ് അഭിനയിച്ചത്.