നിഗൂഢതകൾ ഒളിപ്പിച്ച് മമ്മൂട്ടി ചിത്രം അങ്കിളിന്റെ ട്രൈലർ എത്തി..

ആരാധകർ കാത്തിരുന്ന മമ്മൂട്ടി ചിത്രം അങ്കിളിൻറെ ട്രൈലർ പുറത്തിറങ്ങി. ആരാധക പ്രതീക്ഷ കാക്കുന്ന ഒരു ട്രൈലർ തന്നെയായിരുന്നു പുറത്തിറങ്ങിയത്. ഏറെ നിഗൂഢതകൾ ഒളിപ്പിച്ചു വച്ച ത്രില്ലിംഗ് ആയ ഒരു ട്രൈലറാണ് ഇന്ന് പുറത്തിറങ്ങിയിരിക്കുന്നത്. സാമൂഹിക വിഷയങ്ങൾ ചർച്ചയാകുന്ന അങ്കിൾ മികച്ച ഒരു ത്രില്ലിംഗ് അനുഭവമായി മാറുമെന്നാണ് ട്രൈലർ നൽകുന്ന സൂചന. മമ്മൂട്ടി തന്റെ ഫേസ്ബുക്ക് പേജിലൂടെയാണ് ട്രൈലർ പുറത്തുവിട്ടത്. നവാഗതനായ ഗിരീഷ് ദാമോദറാണ് ചിത്രത്തിൻറെ സംവിധാനം. അവാർഡുകളും നിരൂപക പ്രശംസയും വളരെയധികം നേടിയ ഷട്ടർ എന്ന ചിത്രത്തിനു ശേഷം ജോയ് മാത്യു തിരക്കഥ രചിച്ച ചിത്രമാണ് അങ്കിൾ. മമ്മൂട്ടി ഇതുവരെ ചെയ്തിട്ടില്ലാത്ത ഒരു വ്യത്യസ്ത കഥാപാത്രമായാണ് ചിത്രത്തിൽ എത്തുന്നത് എന്നാണ് അണിയറപ്രവർത്തകർ അറിയിച്ചിരുന്നത്. ചിത്രത്തിന്റെ ട്രെയിലർ കൂടി പുറത്തുവന്നതോടെ അണിയറപ്രവർത്തകരുടെ വാക്കുകൾക്ക് വിശ്വാസ്യത വർദ്ധിച്ചിരിക്കുകയാണ്.

ചിത്രത്തിൽ മമ്മൂട്ടിയെ കൂടാതെ കാർത്തിക മുരളീധരൻ, ജോയ് മാത്യു, കെ. പി. എ. സി ലളിത, സുരേഷ് കൃഷ്ണ, കൈലാഷ്, മുത്തുമണി തുടങ്ങിയവർ ആണ് മറ്റു കഥാപാത്രങ്ങളെ അവതരിപ്പിക്കുന്നത്. കഥ പറയുമ്പോൾ, കയ്യൊപ്പ് തുടങ്ങിയ ചിത്രങ്ങൾക്ക് ശേഷം മമ്മൂട്ടി പ്രതിഫലം വാങ്ങാതെ അഭിനയിക്കുന്ന ചിത്രം കൂടിയാണ് അങ്കിൾ. ആയതിനാൽ തന്നെ ചിത്രത്തിലെ കഥാപാത്രം വളരെ മികച്ചതായിരിക്കുമെന്നു ഏവരും പ്രതീക്ഷിക്കുന്നു. സുഹൃത്തിന്റെ മകളുമൊത്തുള്ള യാത്രയാണ് ചിത്രത്തിന്റെ പ്രധാന ഇതിവൃത്തം പ്രതിനായക ടച്ച് ഉള്ള കഥാപാത്രമായി കുറച്ചു നാളുകൾക്ക് ശേഷം മമ്മൂട്ടി എത്തുന്ന ചിത്രം കൂടിയാണ് അങ്കിൾ. സജി സെബാസ്റ്റ്യൻ, സരിത, ജോയ് മാത്യു തുടങ്ങിയവർ ചേർന്നാണ് ചിത്രത്തിന്റെ നിർമ്മാണം. ചിത്രം ഉടൻ തീയറ്ററുകളിൽ എത്തും.