നീതി നടപ്പാക്കാൻ മെഗാസ്റ്റാർ; ക്രിസ്റ്റഫർ പുതിയ ടീസർ കാണാം

മെഗാസ്റ്റാർ മമ്മൂട്ടിയെ നായകനാക്കി ബി ഉണ്ണികൃഷ്ണൻ സംവിധാനം ചെയ്ത ക്രിസ്റ്റഫർ റിലീസിന് ഒരുങ്ങുകയാണ്. ഈ വരുന്ന ഫെബ്രുവരി ഒൻപതാം തീയതിയാണ് ക്രിസ്റ്റഫർ ആഗോള റിലീസായി എത്തുന്നത്. സെൻസറിങ് പൂർത്തിയായപ്പോൾ യു എ സർട്ടിഫിക്കറ്റ് ലഭിച്ച ഈ ചിത്രം ഒരു ഇൻവെസ്റ്റിഗേഷൻ ത്രില്ലറായാണ് ഒരുക്കിയിരിക്കുന്നത്. ബയോഗ്രഫി ഓഫ് എ വിജിലാന്റി കോപ് എന്ന ടാഗ് ലൈനുമായി എത്തിയിരിക്കുന്ന ഈ ചിത്രത്തിൽ വലിയ താരനിരയാണ് അണിനിരക്കുന്നത്. ഇതിന്റെ പോസ്റ്ററുകൾ, ആദ്യ ടീസർ എന്നിവയെല്ലാം സൂപ്പർ ഹിറ്റായി മാറിയിരുന്നു. ഇപ്പോഴിതാ ഇതിന്റെ രണ്ടാം ടീസർ റിലീസ് ചെയ്തിരിക്കുകയാണ്. ഗൾഫിൽ വെച്ച് നടന്ന ഇതിന്റെ ഗ്ലോബൽ ലോഞ്ചിന്റെ ഭാഗമായാണ് ഈ രണ്ടാം ടീസർ റിലീസ് ചെയ്തത്. പ്രേക്ഷകരെ ആദ്യാവസാനം ത്രില്ലടിപ്പിക്കുന്ന രീതിയിലാണ് ഈ ചിത്രം ഒരുക്കിയിരിക്കുന്നതെന്നും, മെഗാസ്റ്റാറിന്റെ ആക്ഷൻ സീനുകളാണ് ഇതിന്റെ ഹൈലൈറ്റെന്നുമാണ് ടീസറുകൾ നൽകുന്ന സൂചന.

ആറാട്ട് എന്ന മോഹൻലാൽ ചിത്രത്തിന് ശേഷം ഉദയ കൃഷ്ണ ബി ഉണ്ണികൃഷ്ണന് വേണ്ടി തിരക്കഥ രചിച്ച ഈ ചിത്രം, ബി ഉണ്ണികൃഷ്ണൻ തന്നെ തന്റെ ആർ ഡി ഇല്ല്യൂമിനേഷൻ എന്ന ബാനറിൽ നിർമ്മിച്ചിരിക്കുന്ന ചിത്രം കൂടിയാണ്. രണ്ടര മണിക്കൂറാണ് ഈ ത്രില്ലർ ചിത്രത്തിന്റെ ദൈർഘ്യം എന്നാണ് സൂചന. വിനയ് റായ്, ശരത് കുമാർ, ഷൈൻ ടോം ചാക്കോ, ദിലീഷ് പോത്തൻ, സിദ്ദിഖ്, ജിനു ജോസഫ് എന്നിവരും വേഷമിടുന്ന ഈ ചിത്രത്തിലെ പ്രധാന സ്ത്രീ കഥാപാത്രങ്ങൾക്ക് ജീവൻ പകരുന്നത് സ്നേഹ, അമലപോൾ, ഐശ്വര്യ ലക്ഷ്മി എന്നിവരാണ്. ഫെയ്‌സ് സിദ്ദിഖി ക്യാമറ ചലിപ്പിച്ച ക്രിസ്റ്റഫറിന് സംഗീതമൊരുക്കിയത് ജസ്റ്റിൻ വർഗീസും, എഡിറ്റ് ചെയ്തത് മനോജുമാണ്.