ഹാർലി ഡേവിഡ്സണിൽ ചുറ്റിയടിച്ചു മമത മോഹൻദാസ്; വീഡിയോ സോഷ്യൽ മീഡിയയിൽ വൈറൽ.!

മലയാള സിനിമയിലെ ഏറ്റവും മികച്ച നടിമാരിൽ ഒരാളാണ് മമത മോഹൻദാസ്. മലയാളത്തിലെ സൂപ്പർ താരങ്ങൾക്കെല്ലാമൊപ്പം അഭിനയിച്ച മമത ഒരു ഗായിക കൂടിയാണ്. മലയാളത്തിന് പുറമെ മറ്റു തെന്നിന്ത്യൻ ഭാഷകളിലും പ്രത്യക്ഷപ്പെട്ടിട്ടുള്ള ഈ നടിയുടെ ദിലീപുമായുള്ള ഓൺസ്‌ക്രീൻ കെമിസ്ട്രി ആരാധകരുടെ പ്രീയപ്പെട്ട ഒന്നാണ്. ഇപ്പോഴിതാ മമതയുടെ ഒരു കിടിലൻ ബൈക്ക് റൈഡിങ് വീഡിയോ ആണ് സോഷ്യൽ മീഡിയയിൽ വൈറലായി മാറുന്നത്. മമത മോഹൻദാസ് തന്നെയാണ് ഈ വീഡിയോ തന്റെ ഇൻസ്റ്റാഗ്രാം അക്കൗണ്ടിലൂടെ പങ്കു വെച്ചത്. ഹാർലി ഡേവിസൺ ബൈക്കിലാണ് മമതയുടെ ഈ റൈഡ് എന്നതാണ് ഇതിനെ സ്പെഷ്യലാക്കുന്ന മറ്റൊരു കാര്യം. പതിനഞ്ചു വർഷത്തിന് ശേഷമാണു താൻ ബൈക്ക് റൈഡിങ് നടത്തുന്നത് എന്നും ഇപ്പോഴും ബൈക്ക് ഓടിക്കാൻ മറന്നട്ടില്ല എന്നത് അത്ഭുതകരമായ കാര്യമാണെന്നും മമത കുറിക്കുന്നു.

https://www.instagram.com/p/CONvJxphq7w/?utm_source=ig_web_copy_link

സിനിമാ താരമായതിനു ശേഷം നഷ്ടപെട്ട ഒന്നാണ് പബ്ലിക് ആയി ബൈക്കിൽ കറങ്ങുക എന്നതെന്നും മമത പറഞ്ഞു. തന്റെ ബാംഗ്ലൂർ ദിനങ്ങൾ ആണ് ഇപ്പോൾ മനസ്സിൽ നിറയുന്നതെന്നും ഈ നടി വീഡിയോ പങ്കു വെച്ച് കൊണ്ട് കുറിച്ചു. ഹരിഹരൻ ഒരുക്കിയ മയൂഖം എന്ന ചിത്രത്തിലൂടെ മലയാളത്തിൽ അരങ്ങേറ്റം കുറിച്ച മമത മോഹൻദാസ് അഭിനയിച്ചു അവസാനം റിലീസ് ചെയ്തത് ഫോറൻസിക് ആണ്. ഒട്ടേറെ ചിത്രങ്ങളാണ് മമത അഭിനയിച്ചു ഇനി പുറത്തു വരാനുള്ളത്. കുറെയേറെ വമ്പൻ ചിത്രങ്ങളുടെ ഭാഗമായും മമത എത്താനൊരുങ്ങുകയാണ്. ലാൽ ബാഗ്, രാമ സേതു, ബിലാൽ, മ്യാവു , ഭ്രമം, ജൂതൻ, അപ്പോസ്തലൻ, അൺലോക്ക് എന്നിവയാണ് മമതയുടെ ഇനി വരാനുള്ള മലയാളം ചിത്രങ്ങൾ. ഇത് കൂടാതെ ഊമെയ്‌ മിഴികൾ, എനിമി എന്നീ തമിഴ് ചിത്രങ്ങളിലും മമത അഭിനയിക്കുന്നുണ്ട്.