ആക്ഷനും സംഗീതവും കൂട്ടിച്ചേർത്ത തീപ്പൊരി ഗാനം; മഹേഷ് ബാബു ചിത്രത്തിലെ റാപ് സോങ് കാണാം..!

തെലുങ്കു സൂപ്പർ താരം മഹേഷ് ബാബു നായകനായെത്തിയ ഏറ്റവും പുതിയ ചിത്രമാണ് സർക്കാരു വാരി പാട്ട. ഈ കഴിഞ്ഞ മെയ് പന്ത്രണ്ടിന് റിലീസ് ചെയ്ത ഈ ചിത്രത്തിന് സമ്മിശ്ര പ്രതികരണമാണ് പ്രേക്ഷകരിൽ നിന്ന് ലഭിച്ചത്. എന്നിരുന്നാലും ബോക്സ് ഓഫീസിൽ വമ്പൻ കളക്ഷൻ നേടി മുന്നേറുകയാണ് ഈ മഹേഷ് ബാബു ചിത്രം. ഇതിലെ രണ്ടു ഗാനങ്ങൾ നേരത്തെ പുറത്തു വരികയും സൂപ്പർ ഹിറ്റാവുകയും ചെയ്തിരുന്നു. കലാവതി എന്ന് തുടങ്ങുന്ന ഗാനം സോഷ്യൽ മീഡിയയിൽ ട്രെൻഡിങ്ങായി മാറിയപ്പോൾ, മ മ മഹേശാ എന്ന അടിപൊളി ഗാനം യുവാക്കൾക്കിടയിൽ വലിയ ഹിറ്റായി മാറി. ഇപ്പോഴിതാ ഈ ചിത്രത്തിലെ ഒരു റാപ് സോങ് റിലീസ് ചെയ്തിരിക്കുകയാണ്. മഹേഷ് ബാബുവിന്റെ കിടിലൻ ആക്ഷൻ സീനുകൾ ഉൾപ്പെടുത്തിയ വീഡിയോയാണ് ഈ ഗാനത്തിനൊപ്പം പുറത്തു വന്നിരിക്കുന്നത്.

മഹാ ശ്രാവണ ഭാർഗവി ആലപിച്ചിരിക്കുന്ന ഈ ഗാനത്തിന് വരികൾ എഴുതിയതും മഹാ ആണ്. ടീം തമാനിയയാണ് ഈ ഗാനത്തിന് അഡീഷണൽ വരികളെഴുതിയിരിക്കുന്നത്. പ്രശസ്ത സംവിധായകൻ പരശുറാം പെട്‌ല കഥയെഴുതി സംവിധാനം ചെയ്തിരിക്കുന്ന ഈ ചിത്രം മൈത്രി മൂവി മേക്കേഴ്‌സ്, ജി.എം.ബി എന്റര്‍ടൈന്‍മെന്റ്, 14 റീല്‍സ് പ്ലസ് എന്നിവയുടെ ബാനറില്‍ നവീന്‍ യെര്‍നേനി, വൈ. രവിശങ്കര്‍, രാം അജന്ത, ഗോപിചന്ദ് അജന്ത എന്നിവര്‍ ചേര്‍ന്നാണ് നിർമ്മിച്ചിരിക്കുന്നത്. കീർത്തി സുരേഷ് നായികാ വേഷം ചെയ്തിരിക്കുന്ന ഈ ചിത്രത്തിൽ വെണ്ണല കിഷോർ, സുബ്ബരാജു എന്നിവരുമഭിനയിച്ചിരിക്കുന്നു. സൂപ്പർ ഹിറ്റ് ഗാനങ്ങളുടെ അമരക്കാരനായ തമൻ എസ് ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചിരിക്കുന്നത്.