രൺബീർ കപൂറിന്റെ ബ്രഹ്മാണ്ഡ ചിത്രം; ബ്രഹ്മാസ്ത്രയുടെ അത്ഭുതപ്പെടുത്തുന്ന ട്രൈലെർ കാണാം

ബോളിവുഡ് യുവ താരം രൺബീർ കപൂർ നായകനായെത്തുന്ന ഏറ്റവും പുതിയ ചിത്രമാണ് ബ്രഹ്മാസ്ത്ര. ബ്രഹ്മാണ്ഡ ബഡ്ജറ്റിൽ മൂന്നു ഭാഗങ്ങളായി ഒരുക്കുന്ന ഈ ചിത്രത്തിന്റെ ആദ്യ ഭാഗം ഈ വർഷമാണ് റിലീസ് ചെയ്യുന്നത്. ആലിയാ ഭട്ട് നായികാ വേഷം ചെയ്യുന്ന ഈ ചിത്രത്തിൽ അമിതാബ് ബച്ചൻ, നാഗാർജുന എന്നിവരും പ്രധാന വേഷങ്ങൾ ചെയ്യുന്നുണ്ട്. ഇതിന്റെ ടീസർ വലിയ പ്രേക്ഷക ശ്രദ്ധ നേടിയെടുത്തിരുന്നു. ഇപ്പോഴിതാ ഈ ചിത്രത്തിന്റെ ട്രൈലെർ ഇന്ന് പുറത്ത് വന്നിരിക്കുകയാണ്. അക്ഷരാർത്ഥത്തിൽ അത്ഭുതപ്പെടുത്തുന്ന മികവാണ് ഈ ട്രെയിലറിലെ ദൃശ്യങ്ങൾക്കുള്ളത്. ഹോളിവുഡ് ഫാന്റസി ചിത്രങ്ങളെ അനുസ്‌മരിപ്പിക്കുന്ന വി എഫ് എക്സ് നിലവാരമാണ് ഈ ട്രെയിലറിലെ ദൃശ്യങ്ങൾക്കുള്ളത്. അതോടൊപ്പം തന്നെ പ്രേക്ഷകരെ വിസ്മയിപ്പിക്കുന്ന ഒരു പ്രമേയമാകും ഈ ചിത്രം ചർച്ച ചെയ്യുകയെന്നും ഈ ട്രൈലെർ സൂചിപ്പിക്കുന്നു.

അയൻ മുഖർജി ഒരുക്കുന്ന ഈ ചിത്രത്തിൽ മൗനി റോയിയും ഒരു പ്രധാന കഥാപാത്രത്തെ അവതരിപ്പിക്കുന്നു. ബോളിവുഡിന്റെ കിംഗ് ഖാൻ ഷാരൂഖ് ഖാൻ ഇതിൽ അതിഥി വേഷത്തിലുമെത്തുന്നുണ്ടെന്നാണ് റിപ്പോർട്ടുകൾ പറയുന്നത്. ബ്രഹ്മാസ്ത്ര: ഭാഗം ഒന്ന്: ശിവ എന്നാണ് ഈ സീരിസിലെ ആദ്യ ഭാഗത്തിന് നൽകിയിരിക്കുന്ന പേര്. ഇന്ത്യൻ പുരാണങ്ങളിലെ സങ്കൽപ്പങ്ങളിൽ നിന്നും കഥകളിൽ നിന്നും പ്രചോദനമുൾക്കൊണ്ട്, ആധുനിക കാലത്തിന്റെ പശ്‌ചാത്തലത്തിലാണ്‌ ഈ ചിത്രം കഥ പറയുന്നത്. കരൺ ജോഹറിന്റെ ധർമ്മ പ്രൊഡക്‌ഷൻസ്, ഫോക്സ് സ്റ്റാർ സ്റ്റുഡിയോസ്, പ്രൈം ഫോക്കസ്, സ്റ്റാർലൈറ്റ് പിക്ചേഴ്സ് എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. സെപ്റ്റംബർ ഒൻപതിനാണ് ഈ ആദ്യം ഭാഗം ആഗോള റിലീസായി തീയേറ്ററിലെത്തുക. തമിഴ്, തെലുങ്ക്, കന്നഡ, മലയാളം എന്നീ ഭാഷകളിൽ ഈ ചിത്രം വിതരണം ചെയ്യാനുള്ള അവകാശം നേടിയിരിക്കുന്നത് ബ്രഹ്മാണ്ഡ തെലുങ്കു ചിത്രങ്ങളുടെ സംവിധായകനായ എസ് എസ് രാജമൗലിയാണ്.