സ്വവർഗാനുരാഗികളായ യുവതികളുടെ കഥ പറഞ്ഞു മഗിഴിനി; വീഡിയോ കാണാം..!

96 എന്ന വിജയ് സേതുപതി- തൃഷ ചിത്രത്തിലെ കഥാപാത്രം ചെയ്തു ശ്രദ്ധ നേടിയ ഗൗരി കിഷനും പ്രശസ്ത നടി അനഖയും ഒരുമിച്ചു അഭിനയിച്ച ഒരു മ്യൂസിക് വീഡിയോ ആണ് ഇപ്പോൾ പ്രേക്ഷകരുടെ ശ്രദ്ധ നേടുന്നത്. സോഷ്യൽ മീഡിയയിൽ ഇപ്പോഴേ വലിയ ചർച്ചയായി കഴിഞ്ഞു ഈ മ്യൂസിക് വീഡിയോ. മഗിഴിനി എന്ന പേരിൽ പുറത്തു വിട്ടിരിക്കുന്ന ഈ മനോഹരമായ ഗാനത്തിന് ഈണം പകർന്നിരിക്കുന്നത് പ്രശസ്ത സംഗീത സംവിധായകൻ ഗോവിന്ദ് വസന്ത ആണ്. സ്വവർഗാനുരാഗികളായ രണ്ട് യുവതികളുടെ ജീവിതത്തിൽ നടക്കുന്ന സംഭവങ്ങൾ ആണ് ഈ ഗാനത്തിലൂടെ അവതരിപ്പിച്ചിരിക്കുന്നത്. ഗൗരിയും അനഘയും അവതരിപ്പിക്കുന്ന ഈ കഥാപാത്രങ്ങൾ നർത്തകിമാർ ആയത് കൊണ്ട് തന്നെ, ക്ലാസിക്കൽ നൃത്തവും ഈ മ്യൂസിക് വീഡിയോയുടെ നിർണ്ണായക ഭാഗമാണ്.

വി ജി ബാലസുബ്രഹ്മണ്യം ആണ് ഈ മ്യൂസിക് വീഡിയോ സംവിധാനം ചെയ്തിരിക്കുന്നത്. കീർത്തന വൈദ്യനാഥൻ ആലപിച്ച ഈ ഗാനത്തിന് വേണ്ടി വരികൾ എഴുതിയത് മദൻ കർക്കി ആണ്. അരുൺ കൃഷ്ണ രാധാകൃഷ്ണൻ ക്യാമറ ചലിപ്പിച്ചിരിക്കുന്ന ഈ ഗാനത്തിന് വേണ്ടി നൃത്ത ചുവടുകൾ ഒരുക്കിയത് വിശ്വകിരൻ നമ്പി ആണ്. ജോമിൻ ആണ് ഈ മ്യൂസിക് വീഡിയോയുടെ എഡിറ്റർ. സരിഗമ തമിഴ് യൂട്യൂബ് ചാനലിൽ ആണ് ഈ ഗാനം റിലീസ് ചെയ്തിരിക്കുന്നത്. 24 മണിക്കൂറിനുള്ളിൽ മൂന്നര ലക്ഷത്തോളം കാഴ്ചക്കാരെയാണ് ഈ ഗാനത്തിന് ലഭിച്ചിരിക്കുന്നത്. 96 എന്ന ചിത്രത്തിന് ശേഷം തമിഴിൽ ദളപതി വിജയ് നായകനായ മാസ്റ്റർ എന്ന ലോകേഷ് കനകരാജ് ചിത്രത്തിലും അഭിനയിച്ച ഗൗരി കിഷൻ, മലയാളത്തിൽ സണ്ണി വെയ്ൻന്റെ നായികയായി അനുഗ്രഹീതൻ ആന്റണി എന്ന ചിത്രത്തിലും വേഷമിട്ടു.