ത്രില്ലടിപ്പിക്കാന്‍ അരവിന്ദ് സ്വാമിയും കുഞ്ചാക്കോ ബോബനും; ‘രണ്ടകം’ ടീസര്‍……

പ്രശസ്ത തെന്നിന്ത്യൻ താരങ്ങളായ കുഞ്ചാക്കോ ബോബന്‍, അരവിന്ദ് സ്വാമി എന്നിവര്‍ കേന്ദ്ര കഥാപാത്രങ്ങളായെത്തുന്ന രണ്ടകം എന്ന ചിത്രത്തിന്റെ ടീസര്‍ ഇപ്പോൾ വലിയ ശ്രദ്ധയാണ് സോഷ്യൽ മീഡിയയിൽ നിന്നും നേടുന്നത്. തീവണ്ടി എന്ന ടോവിനോ തോമസ് നായകനായ സിനിമയിലൂടെ ശ്രദ്ധ നേടിയ ടി.പി ഫെല്ലിനി ഒരുക്കിയ ഈ ചിത്രത്തിലൂടെ കുഞ്ചാക്കോ ബോബൻ ആദ്യമായി തമിഴിൽ അഭിനയിക്കുകയാണ് എന്ന പ്രത്യേകതയുമുണ്ട്. ഒറ്റ് എന്ന പേരില്‍ ചിത്രം മലയാളത്തിലും റിലീസ് ചെയ്യും എന്നാണ് റിപ്പോർട്ടുകൾ പറയുന്നത്. ഇരുപത്തിയഞ്ച് വര്‍ഷങ്ങളുടെ ഇടവേളയ്ക്ക് ശേഷമാണ് അരവിന്ദ് സ്വാമി മലയാള സിനിമയില്‍ അഭിനയിക്കുന്നത് എന്നതാണ് ഈ ചിത്രം കൊണ്ട് വരുന്ന മറ്റൊരു പ്രത്യേകത. ഒരു മാസ്സ് ത്രില്ലർ ആയാണ് ഈ ചിത്രം ഒരുക്കിയിരിക്കുന്നത് എന്ന സൂചനയാണ് ഇതിന്റെ ടീസർ നമ്മുക്ക് നൽകുന്നത്. ബോളിവുഡ് താരം ജാക്കി ഷറോഫും സുപ്രധാന കഥാപാത്രത്തെ അവതരിപ്പിക്കുന്ന ഈ ചിത്രത്തിലെ നായികാ വേഷം ചെയ്തിരിക്കുന്നത് ഈഷ റേബ ആണ്.

ദി ഷോ പീപ്പിള്‍ ന്റെ ബാനറില്‍ തമിഴ് താരം ആര്യയും ഓഗസ്റ്റ് സിനിമാസിന്റെ ബാനറില്‍ ഷാജി നടേശനും ചേര്‍ന്നാണ് ഈ ചിത്രത്തിന്റെ നിർമ്മാണം നിർവഹിച്ചിരിക്കുന്നതു. എ.എച്ച് കാശിഫ് സംഗീതം ഒരുക്കിയ ഈ ചിത്രത്തിന് ക്യാമറ ചലിപ്പിച്ചത് വിജയ് ആണ്. അപ്പു എൻ ഭട്ടതിരി ആണ് ഈ ചിത്രത്തിന്റെ എഡിറ്റർ. അന്തരിച്ചു പോയ സംവിധായകൻ ഭരതൻ സംവിധാനം ചെയ്ത് 1996ല്‍ പ്രദര്‍ശനത്തിനെത്തിയ ദേവരാഗമാണ് അരവിന്ദ് സ്വാമി ഒടുവിലായി അഭിനയിച്ച മലയാള ചിത്രം. ഗോവയിലും മംഗലാപുരത്തിലുമായാണ് രണ്ടകം എന്ന ഈ ചിത്രം ഒരുക്കിയിരിക്കുന്നത്. ത്രില്ലര്‍ പശ്ചാത്തലത്തില്‍ ഒരുക്കിയ ഈ ചിത്രത്തിന്റെ തിരക്കഥ ഒരുക്കിയത് എസ്.സജീവാണ്.