കായലോണ്ട് വട്ടം വരച്ചേ; വരയനിലെ മനോഹരമായ പുതിയ ഗാനമെത്തി..!

പ്രശസ്ത യുവ താരം സിജു വിൽ‌സൺ നായകനായി എത്തുന്ന ഏറ്റവും പുതിയ ചിത്രമാണ് വരയൻ. മെയ് ഇരുപതിന്‌ റിലീസ് ചെയ്യാൻ പോകുന്ന ഈ ചിത്രത്തിന്റെ ട്രൈലെർ കുറച്ചു നാൾ മുൻപേ റിലീസ് ചെയ്യുകയും സൂപ്പർഹിറ്റായി മാറുകയും ചെയ്തിരുന്നു. അതിനു മുൻപ് ഇതിലെ ഒരു ഗാനവും ശ്രദ്ധ നേടി. ഇപ്പോഴിതാ, ഈ ചിത്രത്തിലെ പുതിയ ഗാനത്തിന്റെ വീഡിയോ റിലീസ് ചെയ്തിരിക്കുകയാണ്. കായലോണ്ട് വട്ടം വരച്ചേ എന്ന വരികളോടെ തുടങ്ങുന്ന ഈ ഗാനം രചിച്ചിരിക്കുന്നത് ബി കെ ഹരിനാരായണനും ഈ ഗാനം ആലപിച്ചിരിക്കുന്നത് സായി ഭദ്ര, അനാമിക പ്രകാശ്, പവനി പ്രകാശ്, ജുവാൻ ലിസബെത്ത്, ക്രിസ്റ്റ മെറിൻ എന്നിവർ ചേർന്നുമാണ്. രജീഷ് രാമൻ ഛായാഗ്രഹണവും ജോൺകുട്ടി എഡിറ്റിംങ്ങും നിർവഹിച്ച ഈ ചിത്രത്തിന് സംഗീതം പകർന്നത് പ്രകാശ് അലെക്‌സാണ്. ഫാദർ എബി കപ്പൂച്ചിൻ എന്ന പുരോഹിതനായാണ് സിജു വിൽ‌സൺ ഈ ചിത്രത്തിൽ എത്തുന്നത്. തിന്മക്കെതിരെ നിശ്ശബ്ദനാകാത്ത, പ്രതികരിക്കുന്ന ഒരു പള്ളീലച്ചനായാണ് സിജു വിൽസൻ ഈ ചിത്രത്തിൽ അഭിനയിക്കുന്നത് എന്നാണ് ട്രൈലെർ സൂചിപ്പിക്കുന്നത്.

സത്യം സിനിമാസിന്റെ ബാനറിൽ പ്രേമചന്ദ്രൻ എ.ജി നിർമ്മിക്കുന്ന ഈ ചിത്രത്തിന് തിരക്കഥ ഒരുക്കിയത് ഡാനി കപ്പുച്ചിൻ ആണ്. നവാഗതനായ ജിജോ ജോസഫ് ആണ് ഈ ചിത്രം സംവിധാനം ചെയ്തിരിക്കുന്നത്. ലിയോണ ലിഷോയ് നായികാ വേഷം ചെയ്യുന്ന ഈ ചിത്രത്തിൽ മണിയൻപിള്ള രാജു, അരിസ്റ്റോ സുരേഷ്, വിജയരാഘവൻ, ജൂഡ് ആന്തണി ജോസഫ്, ജോയ് മാത്യു എന്നിവരും അഭിനയിക്കുന്നുണ്ട്. പറ പറ പറ പാറുപെണ്ണേ എന്ന വരികളോടെ തുടങ്ങുന്ന ഗാനമാണ്, ഇതിൽ നിന്നും ആദ്യം റിലീസ് ചെയ്തു ശ്രദ്ധ നേടിയത്.