പ്രതീക്ഷയുണർത്തി സച്ചിനിലെ പുതിയ ഗാനം എത്തി; ചിത്രം റീലീസിന് ഒരുങ്ങുന്നു..!

പ്രശസ്ത യുവ താരം ധ്യാൻ ശ്രീനിവാസൻ നായകനായി എത്തുന്ന പുതിയ ചിത്രമായ സച്ചിൻ ഈ മാസം റിലീസിന് ഒരുങ്ങുകയാണ്. ജനപ്രിയ നായകൻ ദിലീപ് റീലീസ് ചെയ്ത ഈ ചിത്രത്തിന്റെ ഒഫീഷ്യൽ ട്രയ്ലർ വമ്പൻ പ്രേക്ഷക ശ്രദ്ധ നേടിയെടുത്തിരുന്നു. ഈ ചിത്രത്തിന്റെ ടീസർ, രസകരമായ പോസ്റ്ററുകൾ, ഗാനങ്ങൾ എന്നിവ നേരത്തെ തന്നെ സോഷ്യൽ മീഡിയയുടെ ശ്രദ്ധ പിടിച്ചു പറ്റിയിരുന്നു. ഇപ്പോഴിതാ ഈ ചിത്രത്തിലെ പുതിയ ഒരു ഗാനം കൂടി എത്തിയിരിക്കുകയാണ്. ഷാൻ റഹ്‌മാൻ ഈണമിട്ട കണ്ണീർ മേഘങ്ങൾ എന്ന ഗാനം ആണ് ഇന്ന് റീലീസ് ചെയ്തിരിക്കുന്നത്. മനു മഞ്ജിത് രചിച്ച ഈ ഗാനം ആലപിച്ചിരിക്കുന്നത് ഹിഷാം അബ്ദുൾ വഹാബ്, ബിന്ദു എന്നിവർ ചേർന്നാണ്.

സന്തോഷ് നായർ സംവിധാനം ചെയ്ത ഈ ചിത്രം ഒരു റൊമാന്റിക് കോമഡി എന്റെർറ്റൈനെർ ആയാണ് ഒരുക്കിയിരിക്കുന്നത് എന്നാണ് ട്രയ്ലർ നൽകുന്ന സൂചന. ക്രിക്കറ്റും ക്രിക്കറ്റ് ഇതിഹാസം സച്ചിനോടുള്ള ആരാധനയും ചിത്രത്തിന്റെ പ്രമേയത്തിൽ ഉണ്ടെന്നും ട്രയ്ലർ പറയുന്നു. അന്നാ രാജൻ നായികാ വേഷത്തിൽ എത്തുന്ന ഈ ചിത്രത്തിൽ അജു വർഗീസ്, ഹാരിഷ് കണാരൻ, അപ്പാനി ശരത് എന്നിവരും നിർണ്ണായക വേഷങ്ങളിൽ അഭിനയിച്ചിട്ടുണ്ട്. ഈ ചിത്രത്തിലെ വിനീത് ശ്രീനിവാസൻ ആലപിച്ച ഗാനം നേരത്തെ തന്നെ പ്രേക്ഷക ശ്രദ്ധ നേടിയെടുത്തിരുന്നു.

ജെ ജെ പ്രൊഡക്ഷൻസിന്റെ ബാനറിൽ അഡ്വക്കേറ്റ് ജൂഡ് ആഗ്നെൽ സുധിർ, ജൂബി നൈനാൻ എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിന്റെ കഥയും തിരക്കഥയും സംഭാഷണങ്ങളും ഒരുക്കിയിരിക്കുന്നത് പ്രശസ്ത സംവിധായകനായ എസ് എൽ പുരം ജയസൂര്യ ആണ്. സച്ചിന് വേണ്ടി കാമറ ചലിപ്പിച്ചിരിക്കുന്നതു നീൽ ഡി കുന്നയും എഡിറ്റ് ചെയ്തിരിക്കുന്നത് രഞ്ജൻ എബ്രഹാമും ആണ്.