പ്രത്യാശ പകർന്നു കമൽ ഹാസനൊപ്പം തമിഴിലെ പ്രമുഖർ; വീഡിയോ എഡിറ്റ് ചെയ്ത് മലയാളി സംവിധായകൻ മഹേഷ് നാരായണൻ..!

കോവിഡ് 19 എന്ന മഹാമാരിക്ക് എതിരെയുള്ള പോരാട്ടവുമായി ലോകം ഓരോ നിമിഷവും മുന്നോട്ടു പോകുമ്പോൾ നമ്മുടെ രാജ്യത്തും പ്രതിരോധ പ്രവർത്തനങ്ങൾ അതിശക്തമായ രീതിയിൽ തന്നെ നടക്കുകയാണ്. ഈ സാഹചര്യത്തിൽ ജനങ്ങൾക്ക് പ്രത്യാശ പകരുന്ന ഒരു ഗാനവുമായി എത്തിയിരിക്കുകയാണ് ഉലകനായകൻ കമൽ ഹാസൻ. അദ്ദേഹം രചിച്ച അറിവും അൻപും എന്ന ഈ ഗാനം ഇപ്പോൾ വലിയ പ്രേക്ഷക ശ്രദ്ധയാണ് നേടുന്നത്. പ്രശസ്ത സംഗീത സംവിധായകൻ ജിബ്രാൻ സംഗീതം നൽകിയ ഈ ഗാനത്തിന്റെ വീഡിയോ ഇന്നാണ് റിലീസ് ചെയ്തത്. മലയാളത്തിലെ പ്രശസ്ത എഡിറ്ററും, ടേക്ക് ഓഫ്, മാലിക് എന്നീ ചിത്രങ്ങൾ സംവിധാനവും ചെയ്ത മഹേഷ് നാരായണൻ ആണ് ഈ സോങ് വീഡിയോ എഡിറ്റ് ചെയ്തിരിക്കുന്നത്.

കമൽ ഹാസന്റെ സൂപ്പർ ഹിറ്റ് ചിത്രം വിശ്വരൂപം എഡിറ്റ് ചെയ്ത മഹേഷ് നാരായണൻ അദ്ദേഹവുമായി വലിയ സൗഹൃദം പുലർത്തുന്ന വ്യക്തിയുമാണ്. ഒട്ടേറെ പ്രശസ്ത തമിഴ് ഗായകരും സംഗീത സംവിധായകരും ചേർന്നാണ് ഈ ഗാനം ആലപിച്ചിരിക്കുന്നത്. കമൽ ഹാസനും ഈ ഗാനം ആലപിച്ചവരിൽ ഒരാളാണ്. കമൽ ഹാസൻ തന്നെ ആശയം രൂപപ്പെടുത്തി സംവിധാനം ചെയ്തിരിക്കുന്ന ഈ സോങ് വീഡിയോക്ക് വേണ്ടി പിയാനോ വായിച്ചിരിക്കുന്നത് കുട്ടി സംഗീത മാന്ത്രികനായ ലിഡിയൻ നാദസ്വരമാണ്. കമൽ ഹാസനും ജിബ്രാനും ഒപ്പം ഈ ഗാനത്തിന് ശബ്ദം നൽകിയിരിക്കുന്നത് യുവൻ ശങ്കർ രാജ, അനിരുദ്ധ്, ശങ്കർ മഹാദേവൻ, ബോംബെ ജയശ്രീ, സിദ് ശ്രീറാം, ദേവിശ്രീ പ്രസാദ്, സിദ്ധാർത്ഥ്, ശ്രുതി ഹാസൻ, ആൻഡ്രിയ, മുഗൻ റാവു എന്നിവരാണ്. സമൂഹത്തിൽ കഷ്ടത അനുഭവിക്കുന്ന ഒരുപാട് പാവപ്പെട്ടവരുടെ സംഘർഷങ്ങൾ ഈ വീഡിയോയുടെ ഭാഗമാണ്.