സൂപ്പർഹിറ്റായി വിനീത് ശ്രീനിവാസന്റെ ശബ്ദത്തിൽ കാത്ത് കാത്തിരിപ്പു; പടച്ചോനേ ഇങ്ങള് കാത്തോളീയിലെ പുത്തൻ ഗാനം കാണാം

യുവ താരം ശ്രീനാഥ് ഭാസി നായകനായി എത്തുന്ന ഏറ്റവും പുതിയ ചിത്രങ്ങളിലൊന്നായ പടച്ചോനെ ഇങ്ങള് കാത്തോളീ റിലീസിനൊരുങ്ങുകയാണ്. ഇതിന്റെ ടീസർ, ട്രൈലെർ എന്നിവയെല്ലാം വലിയ പ്രേക്ഷക ശ്രദ്ധയാണ് നേടിയത്. ഇപ്പോഴിതാ ഇതിലെ പുതിയ ഗാനവും സൂപ്പർ ഹിറ്റായി മാറിയിരിക്കുകയാണ്. യൂട്യൂബിൽ ഏഴു ലക്ഷം കാഴ്ചക്കാരിലേക്കടുക്കുന്ന ഈ ഗാനം സോഷ്യൽ മീഡിയയിൽ ട്രെൻഡിങ്ങാണ്. കാത്ത് കാത്തിരിപ്പു എന്ന വരികളോടെ തുടങ്ങുന്ന ഈ ഗാനത്തിന്റെ ലിറിക് വീഡിയോയാണ് ഇപ്പോൾ റിലീസ് ചെയ്തിരിക്കുന്നത്. വിനീത് ശ്രീനിവാസൻ ആലപിച്ചിരിക്കുന്ന ഈ ഗാനം രചിച്ചത് നിധീഷ് നടേരിയും ഈ ഗാനത്തിന് ഈണം പകർന്നത് ഷാൻ റഹ്മാനുമാണ്. രസകരമായ ഈ ഗാനം നേടിയ ശ്രദ്ധ ഈ ചിത്രത്തിന് മേലുള്ള പ്രതീക്ഷകളും വർധിപ്പിച്ചിട്ടുണ്ട്. പ്രശസ്ത നടി ആൻ ശീതൾ നായികാ വേഷം ചെയ്യുന്ന ഈ ചിത്രം സംവിധാനം ചെയ്തിരിക്കുന്നത് ബിജിത് ബാലയാണ്.

സഖാവ് ദിനേശൻ എന്ന കഥാപാത്രമായി ശ്രീനാഥ് ഭാസി അഭിനയിച്ചിരിക്കുന്ന ഈ ചിത്രം ടൈനി ഹാൻഡ്സ് പ്രൊഡക്ഷൻസിന്റെ ബാനറിൽ ജോസ്കുട്ടി മഠത്തിൽ, രഞ്ജിത്ത് മണംബ്രക്കാട്ട്‌ എന്നിവർ ചേർന്നാണ് നിർമ്മിച്ചിരിക്കുന്നത്. പ്രദീപ് കുമാർ കാവുംതറയാണ് പടച്ചോനേ ഇങ്ങള് കാത്തോളീ രചിച്ചിരിക്കുന്നത്. ഗ്രേസ്‌ ആൻ്റണി, രസ്ന പവിത്രൻ, അലെൻസിയർ, ജോണി ആന്റണി, മാമുക്കോയ, ഹരീഷ് കണാരൻ, ദിനേശ് പ്രഭാകർ, ശ്രുതി ലക്ഷ്മി, നിർമൽ പാലാഴി, വിജിലേഷ്, നിർമ്മാതാക്കളിൽ ഒരാളായ രഞ്ജിത്ത് മണമ്പ്രക്കാട്ട്, നാഥാനിയേൽ മഠത്തിൽ, ഉണ്ണി ചെറുവത്തൂർ, രഞ്ജിത്ത് കൺകോൽ എന്നിവരും ഈ ചിത്രത്തിന്റെ താരനിരയിലുണ്ട്. വിഷ്ണു പ്രസാദ് ക്യാമറ ചലിപ്പിച്ച ഈ ചിത്രം എഡിറ്റ് ചെയ്യുന്നത് കിരൺ ദാസാണ്. ഹാസ്യവും പ്രണയവുമെല്ലാം കോർത്തിണക്കിയൊരുക്കിയ ഒരു ചിത്രമാണിതെന്ന സൂചനയാണ് ഇതിന്റെ ടീസർ, ട്രൈലെർ എന്നിവ നൽകിയത്.