ഗാംഗ്സ്റ്റേഴ്സിന്റെ അന്ത്യ അത്താഴം, പ്രേക്ഷകരിൽ ആകാംക്ഷയും ആവേശവും നിറച്ചു കാർത്തിക് സുബ്ബരാജ് ചിത്രത്തിന്റെ മോഷൻ പോസ്റ്റർ

തമിഴ് യുവ താരം ധനുഷിന്റെ നാല്പതാമത്തെ ചിത്രത്തിന്റെ മോഷൻ പോസ്റ്റർ കഴിഞ്ഞ ദിവസം റിലീസ് ചെയ്തു. ധനുഷിനെ നായകനാക്കി കാർത്തിക് സുബ്ബരാജ് ഒരുക്കിയ ഈ ചിത്രത്തിന്റെ പേര് ജഗമേ തന്തിരം എന്നാണ്. വൈനോട്ട് സ്റ്റുഡിയോസ് നിർമ്മിച്ചിരിക്കുന്ന ഈ ചിത്രത്തിന്റെ മോഷൻ പോസ്റ്റർ ഒരുക്കിയിരിക്കുന്നത് യേശു ക്രിസ്തുവിന്റെ അന്ത്യ അത്താഴം എന്ന പൈയ്ന്റിങ്ങിന്റെ ഫോര്മാറ്റിലാണ്. എന്നാൽ ഈ മോഷൻ പോസ്റ്ററിൽ കാണുന്നത് ഗാംഗ്സ്റ്റേഴ്സിന്റെ അന്ത്യ അത്താഴമാണെന്നു മാത്രം. ഈ ചിത്രത്തിലെ പ്രധാന കഥാപാത്രങ്ങളുലൂടെ കടന്നു പോകുന്ന മോഷന്‍ പോസ്റ്റര്‍ അവസാനിക്കുന്നത് അന്ത്യ അത്താഴ’ത്തിന്റെ മാതൃകയിലിരിക്കുന്ന കഥാപാത്രങ്ങളിലാണ് എന്നതാണ് പ്രേക്ഷകരുടെ ആകാംഷയും ആവേശവും വർധിപ്പിക്കുന്നത്.

മലയാളി താരമായ ഐശ്വര്യ ലക്ഷ്മി നായികാ വേഷം ചെയ്യുന്ന ഈ ചിത്രത്തിൽ വമ്പൻ താരനിരയാണ് അണിനിരക്കുന്നത്. പ്രശസ്ത മലയാള താരം ജോജു ജോര്‍ജ്, ഗെയിം ഓഫ് ത്രോണ്‍സ് താരം ജെയിംസ് കോസ്‌മോ, കലൈയരശന്‍, സഞ്ജനാ നടരാജന്‍, ദീപക് പ്രമേഷ്, ദേവന്‍ എന്നിവരും ഈ ചിത്രത്തിലെ നിർണ്ണായക വേഷങ്ങൾ ചെയ്യുന്നു. കട്ട താടിയും പിരിച്ച മീശയുമായി കലിപ്പ് ലുക്കിലാണ് ജോജു ജോർജ് ഈ ചിത്രത്തിൽ പ്രത്യക്ഷപ്പെടുന്നത്. ജോജു ജോർജിന്റെ ആദ്യ തമിഴ് ചിത്രമെന്ന പ്രത്യേകതയും ഇതിനുണ്ട്. സന്തോഷ് നാരായണൻ സംഗീതമൊരുക്കിയ ഈ ചിത്രം ലണ്ടനില്‍ ആണ് പ്രധാനമായും ചിത്രീകരിച്ചത്. ജഗമേ തന്തിരം കേരളത്തില്‍ റിലീസ് ചെയ്യാൻ പോകുന്നത് മലയാളത്തിലെ പ്രശസ്ത നിർമ്മാതാവായ ആന്റോ ജോസഫിന്റെ നേതൃത്വത്തിലുള്ള ആന്റോ ജോസഫ് ഫിലിം കമ്പനിയാണ്. ഏതായാലും ഈ മോഷൻ പോസ്റ്ററോടെ ഈ ചിത്രത്തിന് മുകളിലുള്ള പ്രേക്ഷക പ്രതീക്ഷകൾ ഏറെ വർധിച്ചിരിക്കുകയാണ്.