ഫീൽ ഗുഡ് അല്ല, ഇനി ത്രില്ലറുമായി ജിസ് ജോയ്; ഇന്നലെ വരെ ട്രൈലെർ കാണാം

സൂപ്പർ ഹിറ്റ് സംവിധായകൻ ജിസ് ജോയ് സംവിധാനം ചെയ്ത ഏറ്റവും പുതിയ ചിത്രമാണ് ഇന്നലെ വരെ. നേരിട്ടുള്ള ഒടിടി റിലീസായി സോണി ലൈവിൽ സ്ട്രീം ചെയ്യാൻ പോകുന്ന ഈ ചിത്രത്തിന്റെ ട്രൈലെർ ഇപ്പോൾ പുറത്തു വന്നിരിക്കുകയാണ്. ജൂൺ ഒൻപതിനാണ് ഈ ചിത്രം സ്ട്രീമിങ് ആരംഭിക്കുക. ഒരു പക്കാ ത്രില്ലറായാണ് ജിസ് ജോയ് ഈ ചിത്രം ഒരുക്കിയിരിക്കുന്നതെന്ന് സൂചനയാണ് ഇതിന്റെ ട്രൈലെർ നമ്മുക്ക് തരുന്നത്. ആസിഫ് അലി, ആന്റണി വർഗീസ്, നിമിഷാ സജയൻ, റീബ മോണിക്ക ജോൺ, ഇർഷാദ് അലി, റോണി ഡേവിഡ്, ശ്രീലക്ഷ്മി, അതുല്യ ചന്ദ്ര തുടങ്ങി ഒരു വലിയ താരനിരതന്നെ ഈ ചിത്രത്തിൽ അണിനിരക്കുന്നുണ്ട്. സൺ‌ഡേ ഹോളിഡേ, വിജയ് സൂപ്പറും പൗർണ്ണമിയും തുടങ്ങിയ ഹിറ്റ് ചിത്രങ്ങൾ നമുക്ക് സമ്മാനിച്ച ജിസ് ജോയ്, തന്റെ പ്രസിദ്ധമായ ഫീൽ ഗുഡ് ശൈലിയിൽ നിന്നും മാറി ആദ്യമായി ഒരു പക്കാ ത്രില്ലറൊരുക്കിയിരിക്കുകയാണ്. സൂപ്പർ ഹിറ്റ് ചിത്രങ്ങൾ രചിച്ച ബോബി- സഞ്ജയ് ടീം തിരക്കഥ രചിച്ച ഈ ചിത്രത്തിന്റെ ഫസ്റ്റ് ലുക്ക് പോസ്റ്ററും വലിയ ശ്രദ്ധ നേടിയിരുന്നു.

സെൻട്രൽ അഡ്വെർടൈസിങ് എന്ന ബാനറിൽ മാത്യു ജോര്ജ് നിർമ്മിച്ച ഈ ചിത്രത്തിന് ക്യാമറ ചലിപ്പിച്ചത് ബാഹുൽ രമേശാണ്. ഒപ്പം എന്ന ബ്ലോക്ക്ബസ്റ്റർ മോഹൻലാൽ- പ്രിയദർശൻ ചിത്രത്തിലെ ഗാനങ്ങളൊരുക്കി കയ്യടി നേടിയ ടീം 4 മ്യൂസിക്സ് സംഗീതമൊരുക്കിയ ഈ ചിത്രം എഡിറ്റ് ചെയ്തിരിക്കുന്നത് രതീഷ് രാജ് ആണ്. ജിസ് ജോയ്‌ക്കൊപ്പം ഇത് അഞ്ചാമത്തെ ചിത്രത്തിലാണ് ആസിഫ് അലിയെത്തിയിരിക്കുന്നതെന്ന പ്രത്യേകതയുമുണ്ട്. ജിസ് ജോയ് ഒരുക്കിയ ആദ്യ ചിത്രമായ ബൈസൈക്കിൾ തീവ്സിൽ നായകനായ ആസിഫ് അലി, പിന്നീട് സൺ‌ഡേ ഹോളിഡേ, വിജയ് സൂപ്പറും പൗർണ്ണമിയും എന്നീ ജിസ് ജോയ് ചിത്രങ്ങളിലും നായക വേഷം ചെയ്തു. ഇത് കൂടാതെ മോഹൻകുമാർ ഫാൻസ്‌ എന്ന ജിസ് ജോയ്- കുഞ്ചാക്കോ ബോബൻ ചിത്രത്തിൽ അതിഥി വേഷത്തിലുമെത്തി ആസിഫ് അലി.