നിറത്തിന്റെ മതിൽക്കെട്ടുകൾക്ക് വിട; വൈറലായി യുവ നടിയുടെ ഫോട്ടോഷൂട്ട് വീഡിയോ

നിമിഷ അശോക് എന്ന യുവ മലയാള നടിയുടെ പുതിയ ഫോട്ടോഷൂട്ട് ചിത്രങ്ങളാണ് ഇപ്പോൾ സോഷ്യൽ മീഡിയയിൽ വൈറലായി മാറിയിരിക്കുന്നത്. വെറും ഒരു ഫോട്ടോഷൂട്ട് എന്നതിലുപരി വളരെ വിപ്ലവകരമായ ചില ആശയങ്ങൾ കൂടി മുന്നോട്ട് വെക്കുന്നതാണ് ഈ ഫോട്ടോഷൂട്ടിനെ സോഷ്യൽ മീഡിയയുടെ ചർച്ചാ വിഷയമാക്കുന്നത്. മനുഷ്യ ചിന്താഗതികൾ ഏറെ മാറിക്കൊണ്ടിരിക്കുന്ന സമയമാണിത്. കറുപ്പ് എന്ന നിറത്തിന് നേരത്തെ നമ്മുടെ സമൂഹം നൽകുന്ന വില വളരെ പരിതാപകരമായിരുന്നു. ആ നിറത്തിന്റെ പേരിൽ പലതവണ ചൂഷണം അനുഭവിച്ച പ്രശസ്ത വ്യക്തിത്വങ്ങൾ ഉൾപ്പടെ ഒരുപാട് പേർ നമ്മുടെ സമൂഹത്തിലുണ്ട്. ഇന്ത്യൻ സിനിമയിൽ തന്നെ അതിന് പ്രധാന ഉദാഹരങ്ങൾ കാണാൻ കഴിയുമെന്നതും എടുത്തു പറയേണ്ട വസ്തുതയാണ്. സൗത്ത് ഇന്ത്യൻ സിനിമയിൽ കാണുന്നത്‌ പോലെ കറുപ്പിന്റെ സ്വീകാര്യത ഒരിക്കലും നോർത്ത് ഇന്ത്യൻ സിനിമകളിൽ ലഭിക്കാറുമില്ല.

പൊതുവെ കറുപ്പിന്റെ രാഷ്ട്രീയം പറയാൻ മടിക്കുന്ന ഈ കാലഘട്ടത്തിൽ അതിനായി തുനിഞ്ഞിറങ്ങുന്ന ധാരാളം സിനിമകൾ സൗത്ത് ഫിലിം ഇൻഡസ്ട്രിയൽ ഉണ്ടാകുന്നുണ്ട്. ഈ സാഹചര്യത്തിൽ ഫോട്ടോഗ്രഫി മേഖലയിലും അങ്ങനെയൊരു മുന്നേറ്റം നടത്തിയിരിക്കുകയാണ് ഫോട്ടോഗ്രാഫർ വിനോദ് ഗോപി. കറുപ്പിനെ ഇഷ്ടപെടുന്ന, ആ നിറത്തിൽ അഭിമാനം തോന്നിക്കുന്നവരുടെ ആത്മവിശ്വാസം വർധിപ്പിക്കുന്ന തരത്തിലുള്ള ചിത്രങ്ങളാണ് നിമിഷ അശോകൻ എന്ന യുവനടിയെ വെച്ച് വിനോദ് ഗോപിയൊരുക്കിയത്. അയ്യപ്പനും കോശിയും എന്ന ചിത്രത്തിലൂടെ പ്രേഷകർക്കു പ്രിയങ്കരനായ നരസിംഹ സ്വാമി മേക്കപ്പ് കൈകാര്യം ചെയ്ത ഈ ഫോട്ടോഷൂട്ടിന്റെ വീഡിയോയും വലിയ ശ്രദ്ധ നേടുകയാണ്. നടിയും മോഡലുമായ നിമിഷ അശോക് ഇപ്പോൾ ഡിജോ ജോസ് ആന്റണി സംവിധാനം ചെയ്യുന്ന ജനഗണമന എന്ന ചിത്രത്തിൽ അഭിനയിക്കുന്നുണ്ട്. പൃഥ്വിരാജ് നിർമ്മിക്കുന്ന ആ ചിത്രത്തിൽ സുരാജ് വെഞ്ഞാറമൂട് ആണ് നായക വേഷം ചെയ്യുന്നത്.