ചിരിയുടെ ചെറുപൂരവുമായി ഇട്ടിമാണി ട്രൈലെർ; ചിരിയോണമൊരുക്കാൻ ലാലേട്ടൻ..!

കംപ്ലീറ്റ് ആക്ടർ മോഹൻലാൽ നായകനായി എത്തുന്ന പുതിയ ചിത്രമാണ് ഇട്ടിമാണി മേഡ് ഇൻ ചൈന. നവാഗതരായ ജിബി- ജോജു ടീം തിരക്കഥ രചിച്ചു സംവിധാനം ചെയ്ത ഇട്ടിമാണി മേഡ് ഇൻ ചൈന ഒരു പക്കാ ഫാമിലി എന്റെർറ്റൈനെർ ആയി ആണ് ഒരുക്കിയിരിക്കുന്നത് എന്ന സൂചനയാണ് ഇന്ന് റിലീസ് ചെയ്ത ഈ ചിത്രത്തിന്റെ ട്രൈലെർ നൽകുന്നത്. മലയാളികൾ ഏറെ ഇഷ്ട്ടപെടുന്ന തമാശക്കാരൻ ആയ മോഹൻലാലിനെ അവർക്കു മുന്നിൽ എത്തിക്കുന്ന ചിത്രമായിരിക്കും ഇട്ടിമാണി എന്ന് ട്രൈലെർ കാണിച്ചു തരുന്നു. വളരെ രസകരമായ ഈ ട്രൈലെർ ചിരിയുടെ ഒരു സാമ്പിൾ പൂരം ആണെന്നാണ് സോഷ്യൽ മീഡിയ പറയുന്നത്. പ്രേക്ഷകർക്ക് മുന്നിൽ ചിരിയുടെ വലിയ പൂരം ഒരുക്കാൻ ഇട്ടിമാണി ഓണം റിലീസ് ആയി തീയേറ്ററുകളിൽ എത്തും.

ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഈ ചിത്രത്തിൽ മോഹൻലാലിന് ഒപ്പം അജു വർഗീസ്, ഹാരിഷ് കണാരൻ, ധർമജൻ ബോൾഗാട്ടി, രാധിക ശരത് കുമാർ, ഹണി റോസ്, അശോകൻ, സിജോയ് വർഗീസ്, കൈലാഷ്, കെ പി എ സി ലളിത, വിനു മോഹൻ, സ്വാസിക, വിവിയ, സിദ്ദിഖ്, സലിം കുമാർ, അരിസ്റ്റോ സുരേഷ്, ജോണി ആന്റണി തുടങ്ങി ഒരു വമ്പൻ താര നിര ആണ് അണിനിരക്കുന്നത്. ഷാജി കുമാർ ഛായാഗ്രഹണം നിർവഹിച്ച ഈ ചിത്രത്തിന് സംഗീതം ഒരുക്കുന്നത് ടീം ഫോർ മ്യൂസിക്സ്, കൈലാഷ് മേനോൻ എന്നിവർ ചേർന്നാണ്. ടീം ഫോർ മ്യൂസിക് ഈണം ഇട്ടു എം ജി ശ്രീകുമാർ ആലപിച്ച ഇട്ടിമാണിയിലെ ബൊമ്മ ബൊമ്മ എന്ന ഗാനം ഇതിനോടകം സൂപ്പർ ഹിറ്റായി കഴിഞ്ഞു.