മമ്മൂട്ടിയുടെ ജന്മദിന സ്പെഷ്യൽ വീഡിയോ സോങ്ങുമായി ഒരു കുട്ടനാടൻ ബ്ലോഗ് സംഗീത സംവിധായകൻ ശ്രീനാഥ്..!

മലയാളത്തിന്റെ മഹാനടൻ മമ്മൂട്ടി സെപ്റ്റംബർ ഏഴിന് തന്റെ അറുപത്തിയേഴാം ജന്മദിനം ആഘോഷിക്കുകയാണ്. മമ്മൂട്ടി ആരാധകരും സിനിമ പ്രേമികളും മലയാളം സിനിമാ ഇൻഡസ്ട്രിയും ഒരുപോലെ ആഘോഷമാക്കുന്ന ദിവസങ്ങളിൽ ഒന്നാണ് മമ്മൂട്ടിയുടെ ജന്മദിനം. ഇപ്പോഴിതാ മമ്മൂട്ടിയുടെ ജന്മദിന സ്പെഷ്യൽ വീഡിയോ സോങ്ങുമായി എത്തിയിരിക്കുന്നത് ഒരു കുട്ടനാടൻ ബ്ലോഗ് എന്ന മമ്മൂട്ടി ചിത്രത്തിന്റെ സംഗീത സംവിധായകനായ ശ്രീനാഥ് ശിവശങ്കരൻ ആണ്. ശ്രീനാഥ് ആദ്യമായി സംഗീത സംവിധാനം നിർവഹിച്ച ചിത്രമാണ് ഒരു കുട്ടനാടൻ ബ്ലോഗ്. ഈ മാസം പതിനാലാം തീയതി റിലീസ് ചെയ്യുന്ന ഈ ചിത്രത്തിന്റെ പ്രോമോയും കൂടി ലക്ഷ്യമാക്കിയാണ് ഈ ഗാനം ഒരുക്കിയിരിക്കുന്നത് . മെഗാ സ്റ്റാർ 369 എന്ന ടൈറ്റിൽ കൊടുത്തിരിക്കുന്ന ഈ ഗാനത്തിൽ അഭിനയിച്ചിരിക്കുന്നത് ശ്രീനാഥ് തന്നെയാണ്.

മമ്മൂട്ടി ആരാധകർക്ക് സമർപ്പിച്ചിരിക്കുന്ന ഈ വീഡിയോ സോങ് സംവിധാനം ചെയ്തത് അരുൺ കൃഷ്ണയും ഇതിനു വരികൾ എഴുതിയിരിക്കുന്നത് ഷിൻസൺ പൂവത്തിങ്കലുമാണ്. സംഗീതം പകർന്ന ശ്രീനാഥ് തന്നെയാണ് ഈ ഗാനം ആലപിച്ചിരിക്കുന്നത്. നൃത്ത ചുവടുകളോട് കൂടിയ ഒരടിപൊളി നാടൻപാട്ടിന്റെ രൂപത്തിലാണ് ഈ ഗാനം ഒരുക്കിയിരിക്കുന്നത്. കുട്ടനാടൻ ബ്ലോഗ് എന്ന ചിത്രത്തിലെ രംഗങ്ങളും ഈ ഗാനത്തിൽ ഉൾപ്പെടുത്തിയിട്ടുണ്ട്. സച്ചിൻ ദൃശ്യങ്ങൾ ഒരുക്കിയ ഈ ഗാനം എഡിറ്റ് ചെയ്തിരിക്കുന്നത് സ്വാതി ദേവ് ആണ്. പ്രശസ്ത തിരക്കഥാ രചയിതാവായ സേതു ആദ്യമായി സംവിധാനം ചെയ്യുന്ന ഈ ചിത്രത്തിൽ ലക്ഷ്മി റായ്, ഷംന കാസിം, അനു സിതാര എന്നിവരാണ് നായികാ വേഷത്തിൽ എത്തിയിരിക്കുന്നത്. ശ്രീനാഥ് ഈ ചിത്രത്തിന്റെ സംഗീത സംവിധായകനാവാൻ സമ്മതം മൂളിയതും മമ്മൂട്ടി ആണ്. ഒരു കുട്ടനാടൻ ബ്ലോഗിലെ റിലീസ് ആയ ഗാനങ്ങൾ എല്ലാം തന്നെ പ്രേക്ഷക ശ്രദ്ധ നേടിക്കഴിഞ്ഞു.