ഇവിടുത്തെ മംഗലശ്ശേരി നീലകണ്ഠനും അറക്കൽ മാധവനുണ്ണിയുമൊക്കെ നോം തന്നെയാ; ഷൈലോക്കിന്റെ മെഗാ മാസ്സ് സക്സസ് ടീസർ എത്തി

മെഗാ സ്റ്റാർ മമ്മൂട്ടി നായകനായി എത്തിയ ഈ വർഷത്തെ ആദ്യ റിലീസ് ആയിരുന്നു അജയ് വാസുദേവ് ഒരുക്കിയ ഷൈലോക്ക്. മമ്മൂട്ടി ആരാധകരെ ഏറെ ആവേശം കൊള്ളിച്ച ഈ ചിത്രം ഈ വർഷത്തെ ഹിറ്റ് ലിസ്റ്റിൽ കയറി പറ്റിയ ചിത്രവുമാണ്. ടോട്ടൽ ബിസിനസായി അമ്പതു കോടിയോളം രൂപയാണ് ഈ ചിത്രമുണ്ടാക്കിയത് എന്നാണ് റിപ്പോർട്ടുകൾ പറയുന്നത്. ആഗോള കളക്ഷനായി മുപ്പത്തിയഞ്ചു കോടിയോളമാണ് ഈ മമ്മൂട്ടി ചിത്രം സ്വന്തമാക്കിയത് എന്ന് ട്രേഡ് അനലിസ്റ്റുകൾ റിപ്പോർട്ട് ചെയ്യുന്നു. ഏതായാലും മമ്മൂട്ടി ആരാധകരെ കോരിത്തരിപ്പിച്ച ഒരു മെഗാ മാസ്സ് ചിത്രം തന്നേയായിരുന്നു ഷൈലോക്ക് എന്നതിൽ സംശയമൊന്നുമില്ല. ഇപ്പോഴും പ്രദർശനം തുടരുന്ന ഈ ചിത്രത്തിന്റെ പുതിയ സക്സസ് ടീസർ റിലീസ് ചെയ്തിരിക്കുകയാണ് ഇതിന്റെ അണിയറ പ്രവർത്തകർ. കഴിഞ്ഞ ദിവസം റിലീസ് ചെയ്ത ഈ മാസ്സ് ടീസറിന് വലിയ സ്വീകരണമാണ് മമ്മൂട്ടി ആരാധകർ കൊടുത്തിരിക്കുന്നത്.

ഗുഡ് വിൽ എന്റെർറ്റൈന്മെന്റിന്റെ ബാനറിൽ ജോബി ജോർജ് നിർമ്മിച്ചിരിക്കുന്ന ഈ ചിത്രം അജയ് വാസുദേവ് സംവിധാനം ചെയ്ത മൂന്നാമത്തെ മമ്മൂട്ടി ചിത്രമാണ്. നവാഗതരായ അനീഷ് ഹമീദ്, ബിബിൻ മോഹൻ എന്നിവർ ചേർന്ന് തിരക്കഥ രചിച്ച ഈ ചിത്രം പറയുന്നത് ബോസ് എന്ന് പേരുള്ള ഒരു പലിശക്കാരന്റെ കഥയാണ്. മമ്മൂട്ടിയോടൊപ്പം പ്രശസ്ത തമിഴ് നടൻ രാജ് കിരണും ഈ ചിത്രത്തിൽ നായക തുല്യമായ വേഷം ചെയ്തിരിക്കുന്നു. ഗോപി സുന്ദർ സംഗീതവും റെനഡിവേ ദൃശ്യങ്ങളുമൊരുക്കിയ ഷൈലോക്ക് എഡിറ്റ് ചെയ്തിരിക്കുന്നത് റിയാസ് കെ ബാദറാണ്. കുറച്ചു ദിവസങ്ങൾക്കു മുൻപ് റിലീസ് ചെയ്ത ഈ ചിത്രത്തിന്റെ മേക്കിങ് വീഡിയോയും വലിയ രീതിയിൽ പ്രേക്ഷക ശ്രദ്ധ നേടിയിരുന്നു.