ആർക്കും പിടികൊടുക്കാത്ത കുറുപ്പിന്റെ പുതിയ ചിത്രങ്ങൾ; വീഡിയോ കാണാം..!

യുവ താരം ദുൽഖർ സൽമാൻ നായകനായി എത്തുന്ന ഏറ്റവും പുതിയ ചിത്രമാണ് കുറുപ്പ്. സെക്കന്റ് ഷോ, കൂതറ എന്നിവക്ക് ശേഷം ശ്രീനാഥ് രാജേന്ദ്രൻ ഒരുക്കിയ ഈ ചിത്രം നിർമ്മിച്ചിരിക്കുന്നതും ദുൽഖർ സൽമാൻ തന്നെയാണ്. നവംബർ പന്ത്രണ്ടിന് റിലീസ് ചെയ്യാൻ പോകുന്ന ഈ ചിത്രത്തിന്റെ ടീസർ, ട്രൈലെർ, ഇതിലെ ഒരു വീഡിയോ ഗാനം എന്നിവ ഇതിനോടകം പുറത്തു വരികയും ഗംഭീര ശ്രദ്ധ നേടുകയും ചെയ്തിട്ടുണ്ട്. കേരളത്തിലെ 450 ഓളം സ്‌ക്രീനുകളിൽ ആണ് ഈ ചിത്രം റിലീസ് ചെയ്യുക. കുപ്രസിദ്ധ പിടികിട്ടാപ്പുള്ളി ആയ സുകുമാര കുറുപ്പിന്റെ ജീവിത കഥയാണ് ഈ ചിത്രം പറയുന്നത്. വർഷങ്ങൾക്കു മുൻപ് ചാക്കോ എന്ന നിരപരാധിയെ ചുട്ടു കരിച്ചതിനു ശേഷം നാട് വിട്ട കുറുപ്പിനെ പിന്നീടാരും കണ്ടിട്ടില്ല. ആ കുറുപ്പിന് എന്ത് സംഭവിച്ചു എന്നാണ് ഈ ചിത്രം പറയുന്നത്. ഇപ്പോഴിതാ ഈ ചിത്രത്തിലെ പുതിയ കുറെ സ്റ്റില്ലുകൾ റിലീസ് ചെയ്തിരിക്കുകയാണ്.

കിടിലൻ ലുക്കിൽ ആണ് ദുൽഖർ ഈ ചിത്രത്തിൽ പ്രത്യക്ഷപ്പെട്ടിരിക്കുന്നത്. കെ എസ് അരവിന്ദ്, ഡാനിയൽ സായൂജ് നായർ എന്നിവർ ചേർന്ന് തിരക്കഥ രചിച്ചിരിക്കുന്ന ഈ ചിത്രത്തിൽ ടോവിനോ തോമസ്, സണ്ണി വെയ്ൻ, ഇന്ദ്രജിത് സുകുമാരൻ, ഷൈൻ ടോം ചാക്കോ, ശോഭിത ധുലിപാല, ഭരത്, സുരഭി ലക്ഷ്മി, ആനന്ദ് ബാൽ, എം ആർ ഗോപകുമാർ, ശിവജിത് പദ്മനാഭൻ, ബിബിൻ പെരുമ്പിള്ളിക്കുന്നേൽ, ഹാരിഷ് കണാരൻ എന്നിവരും അഭിനയിച്ചിരിക്കുന്നു. സുഷിൻ ശ്യാം സംഗീതം ഒരുക്കിയ കുറുപ്പിന് വേണ്ടി ക്യാമറ ചലിപ്പിച്ചത് നിമിഷ് രവിയും എഡിറ്റ് ചെയ്തത് വിവേക് ഹർഷനും ആണ്.