പ്രണയത്തിന്റെ സുഗന്ധം പരത്തി ഹൃദയത്തിയിൽ നിന്നൊരു പുതിയ വീഡിയോ..!

ഹൃദയം എന്ന പ്രണവ് മോഹൻലാൽ- വിനീത് ശ്രീനിവാസൻ ചിത്രത്തിൽ നിന്നുള്ള ഒരു പുതിയ വീഡിയോ ഇന്ന് പുറത്തു വന്നിരിക്കുകയാണ്. പ്രണവ് മോഹൻലാൽ, ദർശന രാജേന്ദ്രൻ എന്നിവർ ഒന്നിച്ചുള്ള ഒരു രംഗമാണ് ഈ വീഡിയോയിൽ ഉള്ളത്. അതിനൊപ്പം തന്നെ അവരുടെ കോളേജ് പശ്ചാത്തലവും ഈ വീഡിയോയിൽ കാണാൻ സാധിക്കും. റെയിൽവേ സ്റ്റേഷനിൽ വെച്ചുള്ള ഈ രംഗം ഇപ്പോൾ തന്നെ പ്രേക്ഷകർ ഏറ്റെടുത്തു കഴിഞ്ഞു. വിനീത് ശ്രീനിവാസൻ രചിച്ചു സംവിധാനം ചെയ്ത ഈ ചിത്രത്തിലെ പോസ്റ്ററുകൾ, ദർശന സോങ് ടീസർ, ദർശന സോങ് വീഡിയോ എന്നിവ സോഷ്യൽ മീഡിയൽ തരംഗമാണ്. ദർശന സോങ് വീഡിയോ ആഗോള തലത്തിൽ ആണ് വമ്പൻ ഹിറ്റായി മാറിയത്. അതിനു ശേഷം പുറത്തു വന്ന ഈ പുതിയ വീഡിയോ കൂടി ഇപ്പോൾ പ്രേക്ഷകരുടെ മനസ്സ് കീഴടക്കുകയാണ്. ഹിഷാം അബ്ദുൽ വഹാബ് സംഗീതമൊരുക്കിയ ഈ ചിത്രത്തിൽ പതിനഞ്ചു ഗാനങ്ങൾ ആണുള്ളത്. ദർശന എന്ന ഗാനം ആലപിച്ചത് സംഗീത സംവിധായകൻ ഹിഷാമും നായിക ദർശനയും ചേർന്നാണ്.

അടുത്ത വർഷം ജനുവരിയിൽ ആണ് ഈ ചിത്രം റിലീസ് ചെയ്യാൻ പോകുന്നത്. മെറിലാൻഡ് സിനിമാസിന്റെ ബാനറില്‍ വിശാഖ് സുബ്രഹ്മണ്യം നിര്‍മിക്കുന്ന ഈ ചിത്രത്തിന് ക്യാമറ ചലിപ്പിച്ചത് വിശ്വജിത്തും എഡിറ്റ് ചെയ്‌തത്‌ രഞ്ജൻ എബ്രഹാമുമാണ്. കല്യാണി പ്രിയദർശൻ കൂടി നായികാ വേഷം ചെയ്യുന്ന ഈ ചിത്രത്തിൽ അജു വർഗീസും ഒട്ടേറെ പുതുമുഖങ്ങളും അഭിനയിക്കുന്നുണ്ട്. ഒരു ചെറുപ്പക്കാരന്റെ 17 വയസ്സ് മുതൽ 30 വയസ്സുവരെയുള്ള ജീവിത യാത്രയുടെ കഥയാണ് ഈ ചിത്രം പറയുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്.