‘ആര് കട്ട് ചെയ്യാന്‍ പറഞ്ഞു നിന്നോട്’, ചിരിപ്പിച്ച് മമ്മൂട്ടി; ഗാനഗന്ധര്‍വ്വന്‍ മേക്കിംഗ് വീഡിയോ

പ്രശസ്ത ഹാസ്യ താരവും മിമിക്രി ആർട്ടിസ്റ്റുമായ രമേഷ് പിഷാരടി സംവിധാനം ചെയ്ത് കഴിഞ്ഞ സെപ്റ്റംബർ 27 ന് തിയേറ്ററുകളിലെത്തിയ മമ്മൂട്ടി ചിത്രമാണ് ഗാനഗന്ധര്‍വ്വന്‍. ഒരു കംപ്ലീറ്റ് ഫാമിലി ചിത്രം എന്ന അഭിപ്രായം നേടിയെടുത്ത ഈ സിനിമ മികച്ച വിജയം നേടികൊണ്ട് രണ്ടാം വാരവും കേരളത്തിലെ തീയേറ്ററുകളിൽ പ്രദര്‍ശനം തുടരുകയാണ്. ഈ ചിത്രത്തിൽ കലാസദൻ ഉല്ലാസ് എന്ന ഗാനമേള ഗായകനെ അവതരിപ്പിച്ച മമ്മൂട്ടിയുടെ പ്രകടനത്തിനും മികച്ച പ്രേക്ഷക പ്രതികരണം ആണ് ലഭിക്കുന്നത്. ഇപ്പോഴിതാ ഈ ചിത്രത്തിന്റെ മേക്കിംഗ് വീഡിയോ കൂടി റിലീസ് ചെയ്തിരിക്കുകയാണ് ഇതിന്റെ അണിയറ പ്രവര്‍ത്തകര്‍. മെഗാസ്റ്റാർ മമ്മൂട്ടിയാണ് തന്റെ ഫെയ്‌സ്ബുക്ക് പേജിലൂടെ ഈ മേക്കിംഗ് വീഡിയോ പ്രേക്ഷകരുടെ മുന്നിലേക്ക് എത്തിച്ചത്. ഈ സിനിമ പോലെ തന്നെ അതീവ രസകരമായ രീതിയിൽ ആണ് ഇതിന്റെ മേക്കിങ് വീഡിയോയും ഒരുക്കിയിരിക്കുന്നത്. അത്കൊണ്ട് തന്നെ മികച്ച പ്രതികരണം നേടിയെടുത്തുകൊണ്ട് ആരാധകർക്കിടയിൽ നിറയുകയാണ് ഈ വീഡിയോ.

പുതുമുഖം വന്ദിത മനോഹരൻ നായികയായി എത്തുന്ന ഈ ചിത്രം രചിച്ചിരിക്കുന്നത് സംവിധായകനായ രമേശ് പിഷാരടിയും ഹരി പി നായരും ചേര്‍ന്നാണ്. ചിരിയും സസ്പെന്സും ആവേശവും ഒപ്പം കുറച്ചു ത്രില്ലും ഒക്കെയായി എല്ലാത്തരം പ്രേക്ഷകർക്കും ഇഷ്ട്ടമാവുന്ന തരത്തിൽ ആണ് അവർ ഈ ചിത്രം അണിയിച്ചൊരുക്കിയിരിക്കുന്നത്. കുടുംബ പ്രേക്ഷകരുടെ മികച്ച പിന്തുണയാണ് ഈ ചിത്രത്തെ വലിയ വിജയമാക്കി മാറ്റുന്നത് എന്നു പറയാം.