ത്രില്ലടിപ്പിക്കാൻ ദുൽഖർ സൽമാൻ; മാസ്സ് ട്രൈലെറുമായി സല്യൂട്ട്; വീഡിയോ കാണാം..!

മലയാളത്തിന്റെ യുവ താരം ദുൽഖർ സൽമാൻ നായകനായി എത്തുന്ന പുതിയ ചിത്രമാണ് സല്യൂട്ട്. കുറുപ്പ് എന്ന ചിത്രം നേടിയ വലിയ വിജയത്തിന് ശേഷം എത്തുന്ന ദുൽഖർ ചിത്രമാണ് ഇത്. കരിയറിൽ ആദ്യമായി പോലീസ് വേഷം ചെയ്തു കൊണ്ടാണ് ദുൽഖർ സൽമാൻ നമ്മുടെ മുന്നിൽ എത്തുന്നത്. അരവിന്ദ് കരുണാകരൻ എന്ന പോലീസ് ഓഫീസർ ആയാണ് ദുൽഖർ സൽമാൻ ഈ ചിത്രത്തിൽ അഭിനയിച്ചിരിക്കുന്നത്. റോഷൻ ആൻഡ്രൂസ് സംവിധാനം ചെയ്ത ഈ ചിത്രം രചിച്ചിരിക്കുന്നത് ബോബി- സഞ്ജയ് ടീം ആണ്. ബോളിവുഡ് താരം ഡയാന പെന്റി നായികാ വേഷത്തിലെത്തുന്ന ഈ ചിത്രം, സൂപ്പർ ഹിറ്റായ കായംകുളം കൊച്ചുണ്ണിക്ക്‌ ശേഷം റോഷൻ ആൻഡ്രൂസ്- ബോബി- സഞ്ജയ് ടീം ഒന്നിക്കുന്ന ചിത്രം കൂടിയാണ്. വേ ഫെറർ പ്രൊഡക്ഷൻസിന്റെ ബാനറിൽ ദുൽഖർ സൽമാൻ തന്നെ നിർമ്മിച്ചിരിക്കുന്ന ചിത്രം കൂടിയാണ് സല്യൂട്ട്. ആദ്യം റിലീസ് ചെയ്ത ഇതിന്റെ ടീസർ മികച്ച ശ്രദ്ധ നേടിയിരുന്നു.

ഇപ്പോഴിതാ ഇതിന്റെ ട്രൈലെർ കൂടി പുറത്തു വന്നിരിക്കുകയാണ്. ത്രില്ലടിപ്പിക്കുന്ന ഒരു ചിത്രമായിരിക്കും ഇതെന്ന സൂചനയാണ് ട്രൈലെർ നൽകുന്നത്. ഒപ്പം ദുൽഖർ സൽമാന്റെ ഒരു മാസ്സ് പോലീസ് വേഷമാണ് പ്രേക്ഷകരുടെ മുന്നിലെത്താൻ പോകുന്നത് എന്നും ട്രൈലെർ സൂചിപ്പിക്കുന്നു. മനോജ് കെ ജയൻ, സാനിയ ഇയ്യപ്പൻ, ലക്ഷ്മി ഗോപാലസ്വാമി, സായി കുമാർ, വിജയ കുമാർ, ഗണപതി, ബിനു പപ്പു, അലെൻസിയർ, ബോബൻ ആലുമ്മൂടൻ, ഇർഷാദ്, ദീപക് എന്നിവരും ഈ ചിത്രത്തിന്റെ താരനിരയിൽ ഉണ്ട്. ജേക്‌സ് ബിജോയ് സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന് ക്യാമറ ചലിപ്പിച്ചത് അസ്ലം പുരയില്‍, എഡിറ്റ് ചെയ്തത് ശ്രീകര്‍ പ്രസാദ് എന്നിവരാണ്.