ത്രസിപ്പിച്ചു ദുൽഖർ സൽമാൻ; കുറുപ്പ് ടീസർ ഇതാ..!

മലയാളത്തിന്റെ യുവ താരം ദുൽഖർ സൽമാൻ നായക വേഷത്തിലെത്തുന്ന പുതിയ ചിത്രമായ കുറുപ്പിന്റെ രണ്ടാം ടീസർ ഇന്ന് റിലീസ് ചെയ്തു. ഇന്ത്യയിലെ ഏറ്റവും വലിയ പിടികിട്ടാപ്പുള്ളിയായ സുകുമാര കുറുപ്പിന്റെ കഥയാണ് ഈ ചിത്രം പറയുന്നത്. സെക്കന്റ് ഷോ, കൂതറ എന്നീ ചിത്രങ്ങൾക്ക് ശേഷം ശ്രീനാഥ് രാജേന്ദ്രൻ സംവിധാനം ചെയ്യുന്ന ഈ ബിഗ് ബഡ്ജറ്റ് ചിത്രം, മെയ് 28 നു റിലീസ് ചെയ്യുമെന്നാണ് സൂചന. ദുൽഖർ തന്നെ നിർമ്മാണവും നിർവഹിക്കുന്ന ഈ ചിത്രത്തിന്റെ പുതിയ ടീസറിൽ മാസ് ലുക്കിൽ ആണ് ദുൽഖർ പ്രത്യക്ഷപ്പെടുന്നത്. ഇന്ദ്രജിത് സുകുമാരനും മുഖ്യ വേഷത്തിലെത്തുന്ന ഈ ചിത്രത്തിൽ വലിയ താരനിരയാണ് അണിനിരക്കുന്നത്.

ഷൈൻ ടോം ചാക്കോ, ടോവിനോ തോമസ്, സണ്ണി വെയ്ൻ എന്നിവരുമഭിനയിക്കുന്ന ഈ ചിത്രം കെ എസ് അരവിന്ദ്, ഡാനിയൽ സായൂജ് നായർ എന്നിവർ ചേർന്നാണ് രചിച്ചിരിക്കുന്നത്. നിമിഷ് രവി ഛായാഗ്രഹണം നിർവഹിക്കുന്ന ഈ ചിത്രത്തിന് സംഗീതം ഒരുക്കുന്നത് സുഷിൻ ശ്യാം ആണ്. യഥാർത്ഥ കുറുപ്പ് കൊലപ്പെടുത്തിയ ചാക്കോയുടെ ഭാര്യയും മകനും ഈ ചിത്രത്തിനെതിരെ കോടതിയെ സമീപിച്ചത് വാർത്തയായിരുന്നു. സുകുമാര കുറുപ്പിനെ മഹത്വവൽക്കരിക്കുന്നതോ കൊല്ലപ്പെട്ട ഫിലിം റെപ്രസെന്ററ്റിവ് ചാക്കോയെ അപകീർത്തിപ്പെടുത്തുന്നതോ ആയ ഒന്നും തന്നെ ഈ ചിത്രത്തിൽ ഉണ്ടാവരുത് എന്നാണ് ചാക്കോയുടെ ഭാര്യയും മകനും കേസ് കൊടുത്തുകൊണ്ട് ആവശ്യപ്പെട്ടത്. കേരളത്തിലും നോർത്ത് ഇന്ത്യയിലുമായി ഷൂട്ട് ചെയ്ത ഈ ചിത്രം ദുൽഖറിന്റെ കരിയറിലെ തന്നെ ഏറ്റവും വലിയ ചിത്രങ്ങളിൽ ഒന്നാണ്. ഇപ്പോൾ റോഷൻ ആൻഡ്രൂസ് ഒരുക്കുന്ന സല്യൂട്ട് എന്ന ചിത്രത്തിൽ അഭിനയിക്കുന്ന ദുൽഖർ അതിനു ശേഷം ഒരു തെലുങ്ക് ചിത്രമാവും ചെയ്യുക.