കമ്മിറ്റ്മെന്റ് ടൈറ്റിൽ സോങ് സോഷ്യൽ മീഡിയയിൽ തരംഗമാകുന്നു..

തെലുങ്കിൽ നിന്ന് എത്തുന്ന പുതിയ റോട്ടിക് ത്രില്ലർ ചിത്രമാണ് കമ്മിറ്റ്മെന്റ്. നേരത്തെ എത്തിയ ഇതിന്റെ ടീസർ വലിയ പ്രേക്ഷക ശ്രദ്ധ നേടിയിരുന്നു. ഇപ്പോഴിതാ ഈ ചിത്രത്തിന്റെ ടൈറ്റിൽ സോങ് വീഡിയോ കൂടി റിലീസ് ചെയ്തിരിക്കുകയാണ്. ചൂടൻ രംഗങ്ങളും ഗ്ലാമർ പ്രദർശനവും ആക്ഷനും നിറഞ്ഞ ടീസർ ആയിരുന്നു ഇതിന്റേത് എങ്കിൽ ഇപ്പോൾ വന്നിരിക്കുന്ന ഗാനത്തിലും ഗ്ലാമർ പ്രദർശനത്തിന് കുറവില്ല. വലിയ ക്യാൻവാസിൽ ഒരുക്കിയിരിക്കുന്ന ഈ ചിത്രത്തിൽ തേജസ്വി മടിവാല, അന്വേഷി ജെയ്ൻ, അമിത് തിവാരി, ശ്രീനാഥ്, രമ്യ, സൂര്യ ശ്രീനിവാസ്, സിമർ സിംഗ്, തനിഷ്‌ക് രാജൻ, രാജ രവീന്ദ്ര എന്നിവരാണ് പ്രധാന വേഷങ്ങൾ ചെയ്യുന്നത്. ലക്ഷ്മികാന്ത് ചെന്ന സംവിധാനം ചെയ്തിരിക്കുന്ന ഈ ചിത്രത്തിന് വേണ്ടി നരേഷ് കുമരൻ ആണ് സംഗീത സംവിധാനം നിർവഹിച്ചിരിക്കുന്നത്.

ഇപ്പോൾ പുറത്തു വന്നിരിക്കുന്ന ഈ ടൈറ്റിൽ സോങ് രചിച്ചത് പൂർണചാരി ആണെങ്കിൽ ഈ ഗാനം ആലപിച്ചിരിക്കുന്നത് ശ്രീ കാവ്യാ ചന്ദന, നരേഷ് കുമരൻ എന്നിവർ ചേർന്നാണ്. ഫുട് ലൂസ് എന്റർടെയ്ൻമെന്റ്, എഫ് ത്രീ പ്രൊഡക്ഷൻസ് എന്നിവയുടെ ബാനറിൽ ബൽദേവ് സിംഗ്, നീലിമ ടി എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. സംവിധായകൻ ലക്ഷ്മികാന്ത് ചെന്ന തന്നെ രചിച്ച ഈ ചിത്രത്തിന് വേണ്ടി കാമറ ചലിപ്പിച്ചിരിക്കുന്നതു സജീഷ് രാജേന്ദ്രൻ, നരേഷ് റാണ എന്നിവർ ചേർന്നാണ്. കാർത്തിക്- അർജുൻ, സന്തോഷ് ഹർഷ, കല്ലി കല്യാൺ എന്നിവർ ചേർന്ന് സംഭാഷണങ്ങൾ ഒരുക്കിയ കമ്മിറ്റ്മെന്റ് എഡിറ്റ് ചെയ്തിരിക്കുന്നത് പ്രവി പുടി ആണ്. ഏതായാലും ടീസർ പോലെ തന്നെ ഇതിന്റെ ടൈറ്റിൽ ഗാനവും പ്രേക്ഷക ശ്രദ്ധ നേടിയെടുത്തു കഴിഞ്ഞു.