സൂപ്പർ ഹിറ്റായി ഡോക്ടറിലെ ചെല്ലമ്മ സോങ്; വീഡിയോ കാണാം..!

ശിവകാർത്തികേയനെ നായകനാക്കി നെൽസൺ ദിലീപ്കുമാർ സംവിധാനം ചെയ്ത ഡോക്ടർ എന്ന തമിഴ് ചിത്രം ഇപ്പോൾ ലോകമെമ്പാടും സൂപ്പർ ഹിറ്റായി മുന്നേറുകയാണ്. ഈ മാസം റിലീസ് ചെയ്ത ചിത്രം പ്രേക്ഷകരും നിരൂപകരും ഒരേ മനസ്സോടെ സ്വീകരിച്ചപ്പോൾ കോവിഡ് പ്രതിസന്ധിക്കു ശേഷം തമിഴ് നാട്ടിലെ തീയേറ്ററുകൾക്കു വലിയ ആശ്വാസമാണ് ഈ ചിത്രം സമ്മാനിക്കുന്നത്. കോമെടിയും ആക്ഷനും ത്രില്ലും എല്ലാം ഇടകലർത്തി ഒരുക്കിയ ഈ ചിത്രത്തിന്റെ ഹൈലൈറ്റുകളിൽ ഒന്നാണ് ഇതിലെ സംഗീതം. അനിരുദ്ധ് രവിചന്ദർ ഒരുക്കിയ ഇതിലെ ഗാനങ്ങൾ ഓരോന്നും സൂപ്പർ ഹിറ്റായി കഴിഞ്ഞു. അതിനൊപ്പം തന്നെ ചിത്രത്തിന്റെ പശ്ചാത്തല സംഗീതവും തരംഗമായി മാറിക്കഴിഞ്ഞു. ഇപ്പോഴിതാ ഈ ചിത്രത്തിലെ ചെല്ലമ്മ എന്ന് തുടങ്ങുന്ന പ്രണയ ഗാനത്തിന്റെ വീഡിയോ പുറത്തു വിട്ടിരിക്കുകയാണ് അണിയറ പ്രവർത്തകർ. സോണി മ്യൂസിക് സൗത്ത് യൂട്യൂബ് ചാനലിലൂടെയാണ് ഈ സോങ് വീഡിയോ റിലീസ് ആയിരിക്കുന്നത്.

ഒക്ടോബർ 22 നു റിലീസ് ചെയ്ത ഈ ഗാനം ഇതിനോടകം പതിനഞ്ചു ലക്ഷത്തിലധികം കാഴ്ചക്കാരെ ആണ് ഇരുപത്തതിനാല് മണിക്കൂർ പോലും പിന്നിടുന്നതിനു മുൻപേ നേടിയെടുത്തത്. നായകനായ ശിവകാർത്തികേയൻ തന്നെ വരികളുമെഴുതിയ ഈ ഗാനം ആലപിച്ചിരിക്കുന്നത് സംഗീത സംവിധായകൻ അനിരുദ്ധ് രവിചന്ദറും ജോണിത ഗാന്ധിയുമാണ്. ശിവകാർത്തികേയനും നായികാ വേഷം ചെയ്യുന്ന പ്രിയങ്ക മോഹനും ആടിപ്പാടുന്ന ഈ ഗാനം അതിമനോഹരമായാണ് നെൽസൺ ചിത്രീകരിച്ചിരിക്കുന്നത്. മേല്പറഞ്ഞവരെ കൂടാതെ യോഗി ബാബു, വിനയ്, അർച്ചന, അരുൺ അലക്സാണ്ടർ, ദീപ, ഇളവറസ് എന്നിവരും ഈ ചിത്രത്തിന്റെ താരനിരയിൽ ഉണ്ട്. അടുത്തയാഴ്ച തീയേറ്ററുകൾ തുറക്കുന്നതോടെ ഡോക്ടർ എന്ന ചിത്രം കേരളത്തിലെ പ്രേക്ഷകരുടെ മുന്നിലും എത്തും. ദീപാവലിക്ക് ഈ ചിത്രം ഒറ്റിറ്റിയിലും ലഭ്യമാകും എന്നാണ് സൂചന.