കെ ജി എഫ് മോഡലിൽ ബ്രഹ്മാണ്ഡ ചിത്രം; ഭാവന നായികയായ പുതിയ ചിത്രത്തിന്റെ ടീസർ കാണാം..!

പ്രശസ്ത മലയാള താരം ഭാവന നായികാ വേഷത്തിലെത്തുന്ന ബജ്‌രംഗി 2 എന്ന ബ്രഹ്മാണ്ഡ ചിത്രത്തിന്റെ ടീസർ പുറത്തു വന്നു. കെ ജി എഫ് മോഡലിൽ ഒരുക്കിയിരിക്കുന്ന ഈ ബിഗ് ബജറ്റ് ചിത്രത്തിലെ നായക വേഷം ചെയ്യുന്നത് കന്നഡയിലെ സൂപ്പർ താരമായ ശിവരാജ് കുമാർ ആണ്. രണ്ടു ദിവസം മുൻപ് റിലീസ് ചെയ്ത ഈ ടീസർ സോഷ്യൽ മീഡിയയിൽ നിന്ന് വലിയ പ്രശംസയാണ് നേടിയെടുക്കുന്നത്. ഗംഭീരമായ ദൃശ്യങ്ങളും വി എഫ് എക്സ്ഉം ആക്ഷനും സംഗീതവും നിറഞ്ഞു നിൽക്കുന്ന ഈ ടീസർ ഇപ്പോൾ യൂട്യൂബിൽ ട്രെൻഡ് ചെയ്യുകയാണ്. കിടിലൻ ലുക്കിലാണ് ഭാവനയും ശിവരാജ് കുമാറും ഈ ചിത്രത്തിൽ പ്രത്യക്ഷപ്പെട്ടിരിക്കുന്നത്. 2013 ല്‍ തിയറ്ററുകളിലേക്ക് എത്തിയ സൂപ്പര്‍ ഹിറ്റ് കന്നഡ ചിത്രം ബജ്‌റംഗിയുടെ രണ്ടാം ഭാഗമായാണ് ഈ ചിത്രം ഒരുക്കിയിരിക്കുന്നത്. എ ഹർഷ സംവിധാനം ചെയ്തിരിക്കുന്ന ഈ ചിത്രത്തിൽ ശ്രുതി, ബജരംഗി, ലോകി എന്നിവരും പ്രധാന വേഷങ്ങളിൽ എത്തിയിരിക്കുന്നു.

ജയണ്ണ, ബോഗേന്ദ്ര എന്നിവർ ചേർന്ന് ജയണ്ണ ഫിലിമ്സിന്റെ ബാനറിൽ നിർമ്മാണം നിർവഹിച്ചിരിക്കുന്ന ഈ ചിത്രത്തിന് വേണ്ടി സംഗീത സംവിധാനം നിർവഹിച്ചത് അർജുൻ ജന്യയും ദൃശ്യങ്ങൾ ഒരുക്കിയിരിക്കുന്നത് സ്വാമി ജെ യുമാണ്. ദീപു എസ് കുമാർ എഡിറ്റിംഗ് നിർവഹിച്ചിരിക്കുന്ന ഈ ചിത്രം ഈ വർഷം ഏപ്രിൽ റിലീസ് ആയാണ് പ്ലാൻ ചെയ്തിരുന്നതെങ്കിലും കോവിഡ് പശ്ചാത്തലത്തിൽ റിലീസ് മാറ്റിയിരിക്കുകയാണ്. ഇപ്പോൾ പതിനാലു ലക്ഷത്തിനു മുകളിൽ യൂട്യൂബ് വ്യൂസ് നേടിമുന്നോട്ടു കുതിക്കുകയാണ് ബജ്‌രംഗി 2 ടീസർ. കന്നഡയിലെ ഹാട്രിക്ക് സ്റ്റാർ എന്നറിയപ്പെടുന്ന ശിവരാജ് കുമാറിന്റെ കരിയറിലെ ഏറ്റവും വലിയ ചിത്രങ്ങളിൽ ഒന്നാണ് ബജ്‌രംഗി 2.